काठमाडौं । लामो समयदेखि सम्झौताविना सञ्चालन भइरहेका पुरानो बससपार्क नजिकै राष्ट्रिय सभागृहसँग जोडिएको सिटी मार्केटका ११२ ओटा पसललाई काठमाडौ‌ं महानगरपालिकाले आज सिल गरेको छ । पटक–पटक ताकेता गर्दा पनि सम्झौता नवीकरण गर्न बेवास्ता गरेपछि आज पसललाई नै सिल गर्नुपनरेको काठमाडौं महानगरपालिकाका प्रमुख प्रशासकीय अधिकृत राजेश्वर ज्ञवालीले जानकारी दिए ।

‘‘लामो समयदेखि सम्झौता पनि नभएको अवस्थामा हामीले अब त्यहाँ मार्केट नचलाउने गरी हाललाई बन्द गरेका हौँ,” ज्ञवालील भने, ‘‘अब त्यसलाई भत्काएर सभागृहकै एक पार्टका रूपमा व्यवस्थित गर्छौं ।”

काठमाडौं महानगरपालिका राजश्व विभाग प्रमुख डाक्टर शिव अधिकारीले सिटी मार्केटमा व्यवसाय गर्ने व्यवसायीले २०७६ चैतसम्म व्यवसायीहरूको संघमार्फत केही बहाल बुझाए पनि त्यसपछि नबुझाएको बताए । उनले महानगरको खरिद विभागले आय ठेक्कामा लगाउने गरी सार्वजनिक सूचना प्रकाशित गर्दा समेत कुनै प्रस्ताव पेश नभएको पनि जानकारी दिए ।

नगरप्रहरी प्रमुख धनपती सापकोटाले व्यवसायीलाई पटक–पटक सूचना दिदाँ पनि पसल नहटाएपछि आज प्रहरी र नगरप्रहरीले सिल गरेको बताए । पलस सिल गर्ने क्रममा व्यापारीले विना सूचना हटाएको भन्दै हो–हल्ला गरेका थिए । प्रहरीको काममा अवरोध पुर्‍याउन खोज्ने केही पक्राउ परेका छन् ।