काठमाडौं । भारतमा पछिल्लो २४ घण्टामा झन्डै दुई लाख व्यक्तिमा कोभिड–१९ संक्रमण पुष्टि भएको छ । विश्व स्वास्थ्य संगठनका अनुसार भारतमा बुधबार एक लाख ८४ हजार ३७२ जनामा संक्रमण पुष्टि भएको हो ।

योसँगै गत वर्ष जनवरी ३ देखि बुधबारसम्म भारतमा कुल संक्रमितको संख्या एक करोड ३८ लाख ७३ हजार ८२५ पुगेको छ । भाारतमा बुधबार कोभिड–१९ संक्रमणका कारण एक हजार ३८ जनाको मृत्यु भएसँगै मृतकको संख्या एक लाख ७३ हजार १२३ पुगेको छ ।

कोरोनाभाइरसको दोस्रो लहर सुरु भएको भारतमा दिन–प्रतिदिन संक्रमितको संख्या वृद्धि भइरहेको छ । पछिल्लो नौ दिनमा भारतमा हरेक दिन एक लाख बढीमा संक्रमण देखिएको छ । सबैभन्दा धेरै संक्रमित महाराष्ट्र राज्यमा भेटिएका छन् ।

कुल संक्रमितको झन्डै आधा संख्या महाराष्ट्रका रहेका भारतीय सञ्चारमाध्यमले जनाएका छन् । महाराष्ट्रपछि केरला, कर्णाटक, मध्य प्रदेश, गुजरात, राजस्थान, हरियाणा, पश्चिम बंगाल र बिहार राज्यमा धेरै संक्रमित भेटिएका छन् ।

अप्रिल १० सम्मको तथ्यांकानुसार भारतमा कोरोनाविरुद्धको १० करोड ४३ लाख ६५ हजार ३५ डोज खोप लगाइएको छ ।