वासिङ्टन । अफगानिस्तानबाट अमेरिकी सेना फिर्ता हुने समय यसअघि तोकिएभन्दा चार महिना ढिलो हुने भएको छ । अफगानिस्तानमा रहेका अमेरिकी सेना आउँदो सेप्टेम्बर ११ मा फिर्ता गर्ने तयारी भएको अधिकारीहरुले बीबीसीलाई बताएका छन् ।

यो निर्णय राष्ट्रपति जो बाइडेनले स्थानीय समयानुसार बुधबार सार्वजनिक गर्ने तयारी भएको जनाइएको छ । यसअघि, बाइडेनले मे १ को समयसीमामा सेना फिर्तीको प्रक्रिया पूरा गर्न निकै कठिन रहेको बताएका थिए ।

गत वर्ष ट्रम्प प्रशासनले तालिवानसँग मे १ मा अमेरिकी सेना फिर्ता गर्न सुरु गर्ने सहमति गरेको थियो । तोकिएको नयाँ मिति सन् २००१ मा वर्ल्ड ट्रेड सेन्टर र पेन्टागनमा आतंकवादी हमला भएको मितिसँग मेल खाएको छ ।

अमेरिका र नाटोका अधिकारीहरुले तालिबान प्रतिबद्धतामा अडिग रहन र हिंसा कम गर्न असफल रहेको आरोप लगाउँदै आएका छन् । बाइडेनले हतारमा लिएको फिर्तीको निर्णयले सेनालाई जोखिममा पार्ने भन्दै उनीहरुले उक्त निर्णय व्यावहारिक नभएको बताएका छन् ।