काठमाडौं । चालु आर्थिक वर्षको दोस्रो चौमासमा पनि विप्रेषण आप्रवाह (रेमिट्यान्स) बढेको छ । नेपाल राष्ट्र बैंकले प्रकाशित गरको चालु आर्थिक वर्षको ८ महिनाको तथ्यांक अनुसार मुलुकको आर्थिक तथा वित्तिय अवस्थाको प्रतिवेदनमा गत आर्थिक वर्षको सोही अवधीको तुलनामा रेमिट्यान्स ८.८६ प्रतिशतले बढेको छ । नेपाली मुद्रामा मात्रै नभएर अमेरिकी डलरमा पनि रेमिट्यान्स ५ प्रतिशतले बढेको छ ।

आठ महिनाको अवधिमा करिब साढे ६ खर्ब रेमिट्यान्स भित्रिएको छ । फागुन मसान्त सम्ममा ६ खर्ब ४२ अर्ब १४ करोड रुपैयाँ रेमिट्यान्स भित्रिएको राष्ट्र बैंकले जनाएको छ । गत आर्थिक वर्षको यही अवधीमा ५ खर्ब ९२ अर्ब ४२ करोड रेमिट्यान्स आएको थियो । 

कोभिड १९ को कारण वैदेशिक रोजगारीमा जाने नेपालीको संख्या घट्दा पनि कोभिड पछि अनौपचारीक माध्यमबाट हुने रेमिट्यान्स कारोबार (हुन्डी) घटेसँगै औपचारिक माध्यमबाट आउने रेमिट्यान्स बढेको हो । हुन्डी घट्दा मुलुकलाई विदेशी विनिमयबाट हुने हानी पनि कम भएको छ । तर, अहिले आयात उच्च बिन्दुमा पुगेसँगै हुन्डी बढ्नसक्ने त्रासमा सरकारी अधिकारीहरु छन् ।

आठ महिनाको अवधीमा वैदेशिक रोजगारीका लागि अन्तिम श्रम स्वीकृति (संस्थागत तथा व्यक्तिगत–नयाँ र वैधानिकीकरण) लिने नेपालीको संख्या ७४.८ प्रतिशतले घटेको छ । कोभिडका कारण लामो समय वैदेशिक रोजगारी ठप्प हुँदा वैदेशिक रोजगारीमा जानेको संख्या घटेको हो । गत आर्थिक वर्षको यही अवधीमा यो संख्या २४.२ प्रतिशतले बढेको थियो ।

वैदेशिक रोजगारीका लागि पुनः श्रम स्वीकृति लिने नेपालीको संख्या यस अवधिमा ६५.२ प्रतिशतले घटेको छ । अघिल्लो वर्षको सोही अवधिमा यस्तो संख्या २.७ प्रतिशतले घटेको थियो ।