जनकपुरधाम । जनकपुरधाम उद्योग वाणिज्य संघको निर्वाचनमा मतदान भएकोभन्दा बढी मत उमेदवारको आएको भन्दै असन्तुष्ट पक्षले विरोध जनाएको छ । मतगणनास्थलमा असन्तुष्ट पक्षले प्रदर्शन गरेको हो ।
संघको निर्वाचनअन्तर्गत शनिबार जनकपुरधामस्थित गोपाल धर्मशालामा मतदान सम्पन्न भएको थियो । शनिबारै रातिदेखि मतगणना जारी छ ।
पाँच हजार २७ मतदाता रहेकोमा चार हजार ३११ जनाले मतदान गरेका थिए । आइतबार बिहान १० बजेपछि वरिष्ठ उपाध्यक्ष पदको मतगणनाको क्रममा उमेदवार सुरेन्द्र भण्डारी पक्षधरले मतदानभन्दा बढी मत अर्का उमेदवारलाई आएको भन्दै प्रदर्शन गरेका हुन् । विवाद बढ्दै गएपछि मतगणनास्थल गोपाल धर्मशालामा ठूलो संख्यामा नेपाल प्रहरी र सशस्त्र प्रहरी परिचालन गरिएको छ ।
असन्तुष्ट पक्षले टायर बालेर निर्वाचन समितिविरुद्ध प्रदर्शन गरेको थियो । प्रदर्शनकारीले चर्को नाराबाजी गर्दै ढुंगामुढासमेत गरे । प्रदर्शनकारीबाट ढुंगामुढा भएपछि प्रहरीले लाठीचार्ज गर्यो । लाठीचार्जबाट चारजना प्रदर्शनकारी सामान्य घाइते भएका जनाइएको छ ।
निर्वाचन समिति स्रोतका अनुसार मतगणनामा मनीषरमण साहले अग्रता लिएपछि प्रतिस्पर्धी उमेदवार भण्डारी पक्षले डेढ सय मत बढी भएको भन्दै विवाद सुरु भएको थियो । समितिका अनुसार विवादका कारण वरिष्ठ उपाध्यक्ष पदको मतगणना हाल अवरुद्ध छ ।