रोयटर्स । सप्ताहन्तमा ‘क्रिप्टोकरेन्सी’ बिटक्वाइनको मूल्यवृद्धि भएर पुनः ६१ हजार डलरमाथि पुगेको छ । आपूर्ति कम हुने खबरहरु सार्वजनिक भएपछि बिटक्वाइनको मूल्य शनिबार ६१ हजार २२२.२२ अमेरिकी डलर कायम भएको समाचार संस्था रोयटर्सले जनाएको छ ।
आइतबार बिटक्वाइन ५९ हजार ९०७ डलरमा कारोबार भएको थियो । गत वर्ष जनवरी ४ मा २७ हजार ७३४ डलरमा कारोबार भएको विटक्वाइनको मूल्य त्यसयता ११६ प्रतिशतले वृद्धि भइसकेको छ ।
अमेरिकी राष्ट्रपति जो बाइडेनले १.९ ट्रिलियन डलरको आर्थिक सहायता प्याकेजमा हस्ताक्षर गरेपछि गएको मार्च १३ मा यसको मूल्य सर्वाधिक महँगो ६१ हजार ७८१.८३ कायम भएको थियो ।
हङकङस्थित डिजिटल एसेट कम्पनी डिजिनेक्सका सेल्स म्यानेजर जस्टिन डी एनिथानका अनुसार लगानीकर्ताको ध्यान सेयर बजार र अन्य क्रिप्टोकरेन्सीमा परेपछि पछिल्ला केही हप्तामा विटक्वाइनको मूल्य ५० हजार डलर आसपासमा झरेको थियो । माइनरहरुले नयाँ बिटक्वाइन तत्काल नबेच्ने बताएपछि शनिबार यसको मूल्यमा तीव्र वृद्धि भएको हो ।
लगानी र भुक्तानीका रुपमा मूलधारका कम्पनीले स्वीकार गरेपछि यो वर्ष विटक्वाइनको मूल्य असाधारण तरिकाले बढेको जानकारहरुको भनाइ छ । बीएनवाई मेलोन, ब्याकरक, मास्टर कार्डजस्ता फर्मको सहयोग र टेस्ला, माइक्रोस्ट्राटेजीलगायत ठूला कम्पनीको लगानीका कारण पनि तीव्र वृद्धि भएको हो ।
मोर्गन स्टानलीलगायत अमेरिकी बैंकले पनि वेल्थ म्यानेजमेन्ट क्लाइन्टलाई विटक्वाइनमा पहुँच दिने तयारी गरिरहेका छन् ।
