विराटनगर । पानी भन्डारण गर्ने हिलटेक ट्यांकी खाली देखिन्छ । पानी आउने पाइप फुटेको छ । प्लास्टिकमा बेरिएको साबुन सुकेर चाउरी परेको छ । हात धुन प्रयोग हुने बेसिन र साबुन राख्ने ठाउँ माटो र पतिगंरले पुरिएको छ । धाराबाट पनि पानी चुहिँदैन बरु बुङबुङ्ती धुलो उड्छ ।

जिल्ला समन्वय समिति मोरङ र १ नम्बर प्रदेशसभा परिसरअगाडि जस्तै जिल्ला अदालत मोरङ तथा जिल्ला ट्राफिक प्रहरी कार्यालय पूर्वपट्टिको ट्यांकीको हालत पनि उस्तै देखिन्छ । विराटनगर महानगरपालिकानजिकै धात धुन बनाइएको ठाउँको हालत पनि खासै फरक छैन ।

विराटनगरको भाटभटेनी सुपरमार्केट आउने उपभोक्तालाई हातमा स्यानिटाइजर दलेर प्रवेश गराउने नियम हटाइएको छ । दुई महिनाअघिसम्म कडिकडाउ रुपमा मास्क लगाउन लगाएको देखिन्थ्यो । स्यानिटाइजर छर्कने गरिन्थ्यो । सेन्ट्रल मलमा उपभोक्ताको हातमा स्यानिटाइजर छर्केर ज्वरो जाँच्न छाडिएको महिनौँ भइसक्यो ।

विराटनगरका सिनेमा हल र ठूला व्यापारिक प्रतिष्ठानमा समेत हिजोआज ज्वरो जाँद गरिँदैन । उपभोक्ता र सेवाग्राहीले सोझै प्रवेश पाउँछन् । हात धुन लगाउने र स्यानिटाइजर छर्कनेक्रम रोकिएको छ । मास्क लगाए/नलगाएको विषयमा खटिएका सुरक्षा गार्डले निगरानी गर्दैनन् । क्लिनिक र निजी अस्पतालमा मास्क नलगाएका सेवाग्राहीको भिड लाग्ने गरेको छ ।

कोरोना संक्रमणको दर बढेका बेला मानिसले पालना गर्नुपर्ने स्वास्थ्य सुरक्षाको मापदण्डप्रति बेवास्ता हुन थालेको कोसी अस्पतालका मेडिकल सुपरिटेन्डेन्ट चुमनलाल दास बताउँछन् । उनले भने, “कोरोनाको महामारी हराएको होइन । बरु, दोस्रो लहर आउने जोखिम थप बढेको हो । तर, मानिसहरुले यसप्रति खासै चासो दिएको देखिँदैन । बारम्बार हात धुने, भिडमा नजाने र मास्क लगाउने बानी छाडनु हुँदैन ।”

भारतमा कोरोनाको दोस्रो लहर अधिक भइरहेको बेला नेपालतर्फ थप जोखिम रहेकोले सरकारले पछिल्लोपटक जारी गरेका स्वास्थ्यसम्बन्धी मापदण्डलाई पालना गर्नुपर्ने उनले बताए ।

१ नम्बर प्रदेशको राजधानी विराटनगरमा कोरोनाको दोस्रो लहर सुरु भएको संकेतहरुसमेत मिल्न थालेको स्वास्थ्यकर्मीले बताएका छन् । भारतसँग साइनो भएका र काम विशेषले उता गई आएकाहरुमा पछिल्लो संक्रमण देखिन सुरु भएको आंकलन गरिएको छ । पछिल्लो तीन दिनको तथ्यांकले पनि विराटनगरमा कोरोनाको संक्रमण विगतको प्रारम्भिक चरणजस्तै बढ्न थालेको पाइएको छ । सामाजिक विकास मन्त्रालयको तथ्यांकानुसार प्रदेशमा पछिल्लोपटक संक्रमण पुष्टि भएकाहरुमा सबैभन्दा धेरै संक्रमित विराटनगरभित्रैका छन् ।

विराटनगर महानगरपालिका स्वास्थ्य महाशाखाका प्रमुख रमेश कार्की कोरोनाको दोस्रो लहर अधिक गतिमा फैलने छिमेकी भारत र अन्य देशको अनुभवले समेत देखाएकोले सतर्क हुनुपर्ने बताउँछन् । उनले भने, “कोरोनाको नयाँ भेरिएन्ट्स धेरै चाँडो फैलने भएकोले जोखिम अझ धेरै छ । त्यही भएरु सतर्क हुन आवश्यक छ ।”  उनले कोरोनाको सावधानीपूवर्क मुकाबिला गर्न र बेवास्ता नगर्न सर्वसाधारणलाई आग्रह गरे ।