काठमाडौं । नेपाल पत्रकार महासंघको आगामी नेतृत्व चयनको लागि भएको मतदानको मतपरिणाम आउने क्रम जारी छ ।
निर्वाचन समितिका सदस्य रामहरि सिलवालका अनुसार अहिलेसम्म मुलुकका विभिन्न ६० जिल्लाको मतपरिणाम आइसकेको छ । रुकुमपूर्वबाहेक ७६ जिल्लामा निर्वाचन भएको थियो । अझै १६ जिल्लाको मतपरिणाम आउन बाँकी रहेको उनले जानकारी दिए ।
पत्रकार महासंघको केन्द्रीय कार्यालय सञ्चारग्राममा अहिले काठमाडौ जिल्लाको मतगणना भइरहेको छ । पछिल्लो मतपरिणामानुसार विपुल पोखरेल नेतृत्वको प्यानल नै अगाडि आइरहेको छ । पोखरेल नेतृत्वको प्यानल अर्का प्रतिस्पर्धी निर्मला शर्मा नेतृत्वको प्यानलभन्दा दुई हजार बढी मतान्तरले अगाडि रहेको निर्वाचन समिति सदस्य सिलवालले जानकारी दिए ।
पछिल्लो मतपरिणामानुसार पोखरेल नेतृत्वको समूहले पाँच हजार ३०० मत र शर्मा नेतृत्वको समूहले तीन हजार मत ल्याएको सिलवालले जानकारी दिए ।
विद्युत् आपूर्तिमा समस्या आएकाले जाजरकोट, हुम्लालगायत केही जिल्लाको मतपरिणाम केन्द्रसम्म आइपुग्न कठिनाइ भएको उनले बताए बताए ।
मुलुक संघीय संरचनामा गएपछि महासंघको नेतृत्व पहिलोपटक प्रत्यक्ष निर्वाचन प्रणालीबाट चयन हुन लागेको हो ।
