काठमाडौं । कोरोना संक्रमणको दर बढेसँगै फेरि लकडाउन हुने आशंकाबीच विद्यालयको पठनपाठन चलिरहेको छ । तर, कोरोना कहरले बिथोलिएको शैक्षिक क्षेत्रमा यसपटक मलमको रुपमा आएको छ, माई सेकेन्ड टिचर । 

शैक्षिक क्षेत्रमा आमुल परिवर्तन गर्ने उद्देश्यले ई–लर्निङ प्ल्यार्टफर्ममा आएको माई सेकेन्ड टिचर नयाँ वर्ष ०७८ बाट प्रोडक्टको रुपमा देशैभरि उपलब्ध हुँदैछ ।
वेबसाइटमा https://mysecondteacher.com.np/ मा गएपछि कक्षा १ देखि १२ सम्मका सम्पूर्ण विषयका भिडियोहरु अन्तक्र्रियात्मक रुपमा राखिएको छ । यो माध्यम नेपालको शैक्षिक क्षेत्रमा कोशेढुंगा सावित हुने इन्नोभेट टेकका संस्थापक अध्यक्ष सुलभ बुढाथोकी बताउँछन् । ‘माई सेकेन्ड टिचर’ निर्माणसमेत गरेका बुढाथोकी एकवर्ष लगाएर क्याम्ब्रिजका विद्वान प्राध्यापकको सहयोगमा प्रोडक्ट तयार गरेका थिए ।
 
‘माई सेकेन्ड टिचर’ यसअघि नै बुढाथोकीले बनाएर विश्वका १८ विकसित देशका क्याम्ब्रिज स्कुलहरुका हजारौँ विद्यार्थी, शिक्षक तथा अभिभावकहरुले प्रयोग गर्दै आएको उनले पत्रकार सम्मेलनमा जानकारी दिए । 

पत्रकार सम्मेलनमा उनले वेबसाइट कसरी चलाउने भनेर डेमोस्ट्रेसन समेत दिएका थिए । जसमा अन्तरक्रियात्मक भिडियोमा जीव विज्ञानमा रक्त सञ्चार र धमनीबारे पढाइएको थियो । नेपाली र अंग्रेजी दुवै भाषामा पढाइएको भिडियोमा सुरुमा पढाइने विषयवस्तुमा के–के पढाइने र विद्यार्थीेले सो पाठ्यक्रम पढेपछि के–के सिक्छन् भन्ने उल्लेख छ । पढाएको बुझाउन चित्रहरुको प्रयोग गरिएको छ भने विद्यार्थीले बुझे नबुझेबारे जाँच गर्न रमाइलो क्विज पनि राखिएको छ । यस्तै, वेबसाइटमा विद्यार्थीको लागि ड्यासबोर्ड बनाइएको छ । जसमा विद्यार्थीले कुन विषय पढे र कति बुझे भन्नेबारेको ज्ञान शिक्षकले सजिलै हेर्न सक्छन् । नबुझेका कुरा अनलाइनबाट सजिलै सोध्न मिल्ने र अनलाइन ट्युटर सेवा पनि रहेको छ । त्यस्तै, अभिभावकले त्यस बारेमा तुरुन्तै जानकारी पाउन सक्छन् । विद्यार्थी कहाँ केमा कमजोर छ, वेबसाइटमा रहेको रिपोर्टकार्डले देखाउने छ । आफ्नो क्षमता जाँच्न विद्यार्थीले सुरुमै टेस्ट लिन सक्नेछन् । यस्तै, साइटमा कति विद्यार्थी कुन विषय पढिरहेका छन्, कुन शिक्षकले के पढाइरहेका छन् ? जस्ता प्रत्यक्ष जानकारी बाहिर बसेर पनि लिन सकिने बुढाथोकी बताउँछन् ।

निजी विद्यालयलाई केही प्रतिशत शुल्क लिएर साइट प्रयोग गर्न दिने बताइए पनि सरकारी विद्यालयलाई भने निःशुल्क प्रयोग गर्न दिने बताइएको छ ।
 
हाल एसईई दिने विद्यार्थीलाई लक्षित गरेर ल्याइएको गणित, विज्ञान, अंग्रेजी र ऐच्छिक अर्थशास्त्र विषयका शिक्षक विद्यार्थीको कुराकानीमा आधारित अन्तरक्रियात्मक भिडियो सामग्री देशभर उपलब्ध हुनेछन् ।
 
सन् २०२० मा एसिया प्यासिफिक क्षेत्रका उत्कृष्ट १० ई–लर्निङ प्ल्यार्टफर्ममा पर्न सफल ‘माई सेकेन्ड टिचर’ अमेजन वेब सर्भिसेसको एड स्टार्ट अवार्डबाट समेत सम्मानित छ ।