काठमाडौं । पर्साको वीरगन्ज महानगरपालिका–१०, रानीघाट क्षेत्रबाट स्रोत नखुलेको १६ लाख रुपैयाँसहित तीनजना पक्राउ परेका छन् ।

पक्राउ पर्नेहरुमा पर्सागढी नगरपालिका–४। पश्रामपुर बस्ने ४५ वर्षीय तवारख देवान र सोही ठाउँ बस्ने ६० वर्षीय जोखन साई फकिर र वीरगन्ज–१०, आदर्शनगर बस्ने ५० वर्षीय उमेश शर्मा रहेका छन् ।

रानीघाट पुलस्थित सडकबाट स्रोत नखुलेको रकम र ना१२प ५०७३ नम्बरको मोटरसाइकलसहित तवारख र जोखन साईलाई बुधबार प्रहरीले पक्राउ गरेको थियो । थप अनुसन्धान गर्ने क्रममा उक्त कारोबारमा उमेशको समेत सलंग्नता रहेको खुल्न आएपछि प्रहरीले उनलाई पनि पक्राउ गरेको हो ।

उनीहरुविरुद्ध बैंक तथा वित्तीय संस्थासम्बन्धी ऐन, २०७३ विपरीतको कसुरमा जिल्ला अदालत पर्साबाट सात दिन म्याद थप अनुमति लिई अनुसन्धान अगाडि बढाइएको जिल्ला प्रहरी कार्यालय पर्साले जनाएको छ ।