काठमाडौं । स्वास्थ्य तथा जनसंख्या मन्त्रालयले कोभिड १९ को संक्रमण दर बढेपछि उच्च सतर्कता अपनाउन सरोकारवालाहरुलाई अनुरोध गरेको छ ।
मन्त्रालयले सार्वजनिक यातायात, मन्दिर, सिनेमा हल, सपिङ मललगायतका भीडभाड हुने स्थानमा, जनस्वास्थ्यका मापदण्ड कडाइका साथ पालना गर्न र मापदण्ड लागु भए नभएको निगरानी गर्न स्थानीय तहहरुलाई सूचित गरेको छ ।
ठूला सहरहरुमा ५०० भन्दा बढी र साना सहरमा १०० भन्दा बढी संक्रमित देखिएमा ती स्थानमा अवागमन कडाइ गर्नसमेत स्थानीय प्रशासनलाई मन्त्रालयले अनुरोध गरेको छ ।
रात्रिकालीन व्यवसाय ९ बजेपछि अनिवार्य बन्द गर्ने, विदेशबाट आएकालाई क्वारेन्टिन अनिवार्य गर्ने र र्यान्डम एन्टिजेन परीक्षण गराउन पनि मन्त्रालयले सम्बन्धित सबैमा सूचित गरेको छ । पछिल्लो समय विद्यालय जाने उमेर समूहमा पनि संक्रमण बढेकाले सतर्कता अपनाउन मन्त्रालयले शैक्षिक संस्थाहरुलाई सुझाएको छ ।
युके भेरियन्टको सम्भावना छ : इडीसीडी
पछिल्लो समय संक्रमित भएकाहरुमा युके भेरियन्ट रहेको लक्षण देखिएको इपिडिमियोलोजी तथा रोग नियन्त्रण महाशाखाले जनाएको छ ।
संक्रमितहरुमध्ये धेरैको नमूनामा एस जीनको नेगेटिभको मात्रा धेरै देखिएको इपिडिमियोलोजी तथा रोग नियन्त्रण महाशाखाका निर्देशक डा. कृष्ण प्रसाद पौडेलले बताए ।
“युके भेरियन्टमा एस जिन नेगेटिभ देखिन्छ पछिल्लो समय नेपालमा यस्ता संक्रमितहरु देखिन थालेका छन् जसलाई युके भेरियन्टको लक्षणको रुपमा लिन सकिन्छ । त्यसैले पनि अति कडाइका साथ जनस्वास्थ्यका मापदण्ड पालना गर्नु गराउनु संक्रमण नियन्त्रणको उपाय हो,” डा. पौडेलले भने ।
