काठमाडौं । सुदूरपश्चिम प्रदेशका ९ जिल्लामा नेकपा एमालेका वरिष्ठ नेता झलनाथ खनाल र माधवकुमार नेपाल समूहले समानान्तर कमिटी बनाएको छ । मंगलबार प्रदेश कमिटीको बैठक राखेर ९ वटै जिल्लामा समानान्तर कमिटी बनाइएको कैलालीका जिल्ला अध्यक्ष दीर्घ सोडारीले जानकारी दिए ।
सोडारीलाई हिजै खनाल–नेपाल समूहले कैलाली अध्यक्ष बनाएको हो । त्यस्तै, कञ्चनपुरमा तारा लामालाई अध्यक्ष चयन गरिएको सोडारीले जानकारी दिए । उनका अनुसार खनाल–नेपाल समूहमा यसअघि नै ६ जिल्ला अध्यक्ष थिए । अहिले तीन जिल्लामा मात्रै नयाँ नेतृत्व चयन गरिएको हो ।
घोषणा गरिएको अध्यक्षमा डडेलधुरामा डा. तारा जोशी, डोटीमा चक्र मल्ल, बझाङमा दिलबहादुर सिंह, बैतडीमा महादेव भट्ट, बजुरामा गगन रावल रहेको सोडारीले बाह्रखरीलाई जानकारी दिए ।
दार्चुलामा यसअघि उपसचिव रहेका ज्ञानेन्द्र घर्ती अध्यक्ष बनेका छन् । अध्यक्ष र सचिव ओली समूहमा लागेका छन् । अछाममा शेरबहादुर कुँवरको नेतृत्वमा कमिटी बनाइएको सोडारीको भनाइ छ । कुँवर पहिल्यै जिल्ला अध्यक्ष र खनाल–नेपाल समूहमै थिए ।
कमिटीको पूर्ण विवरण बुधबार दिउँसो मात्रै सार्वजनिक गरिने बताइएको छ ।