काठमाडौं । नेपाल पत्रकार महासंघको नयाँ कार्यसमिति चयनका लागि आज निर्वाचन हुँदै छ । निर्वाचनमा देशभरका १३ हजार १२२ पत्रकारले मतदान गर्ने छन् । अघिल्लो निर्वाचनसम्म पार्सदले मात्रै मतदान गर्न पाउने व्यवस्था भए पनि यो पटकदेखि प्रत्यक्ष निर्वाचन हुन लागेको हो ।

महासंघले विधान संशोधन गरेर यसपटक सबै साधारण सदस्यले जिल्ला, प्रदेश र केन्द्रका सबै पदाधिकारी एवं सदस्यका लागि मतदान गर्न पाउने प्रावधान मिलाएको हो ।

जिल्ला, एसोसियट्स, प्रदेश र केन्द्रका लागि एकैपटक मतदान हुँने छ । आफू सदस्य रहेको शाखामै मतदान गर्न पाइनेछ । मतदान बिहान ९ बजेदेखि साँझ ५ बजेसम्म हुने नेपाल पत्रकार महासंघको केन्द्रीय निर्वाचन कमिटीले जनाएको छ । 

महासंघको केन्द्रीय अध्यक्षका लागि विपुल पोखरेल, निर्मला शर्मा र गजेन्द्रसिंह बुढाथोकीको उम्मेदवारी परेको छ । 

महासङ्घका जिल्ला शाखा ७७, प्रतिष्ठान शाखा ४२, एसोसिएट सदस्य ११, वैदेशिक शाखा नौ, प्रदेश परिषद् १०, प्रदेश समिति १०, केन्द्रीय परिषद् र केन्द्रीय समिति रहेका छन् । महासङ्घको केन्द्रीय समिति ४९ सदस्यीय रहेको छ भने प्रदेश समिति २१ सदस्यीय रहने विधानको प्रावधान छ । जिल्ला तथा प्रतिष्ठान शाखा भने सदस्य सङ्ख्याअनुसार रहने व्यवस्था छ ।

नेपाल पत्रकार महासङ्घ सम्पूर्ण नेपाली पत्रकारहरुको साझा छाता सङ्गठन हो । देश विदेशमा रहेका नेपाली पत्रकारहरुलाई सङ्गठित गर्दै व्यावसायिक नेतृत्व प्रदान गर्ने र श्रमजीवी पत्रकारहरुको हकहित रक्षा गर्दै सम्पूर्ण सञ्चार क्षेत्रको विकासका लागि काम गर्नु महासङ्घको मूल ध्येय, लक्ष्य र दायित्व रहेकाे महासंघकाे विधानमा उल्लेख छ ।  विसं २०१२ चैत १६ गते गठन भएको नेपाल पत्रकार सङ्घको निरन्तरताका रूपमा महासङ्घ रहेको छ । वि.सं २०५३ जेठ २९ मा सङ्घलाई महासङ्घमा रूपान्तरण गरिएको हो ।