दुबई । इरान र अमेरिकाले परमाणु सम्झौताका विषयमा मंगलबार अप्रत्यक्ष वार्ता गर्ने भएका छन् । सन् २०१५ मा भएको परमाणु सम्झौता दुबै देशले पालना गर्ने विषयमा सहमति जुटाउने उद्देश्यले वार्ता गर्न लागिएको अन्तर्राष्ट्रिय सञ्चारमाध्यमले जनाएका छन् ।
सन् २०१८ मा अमेरिका उक्त सम्झौताबाट पछि हटेर इरानमाथि आर्थिक प्रतिबन्धहरू लगाएपछि इरानले परमाणु कायक्रमलाई पुनः निरन्तरता दिएको थियो । प्रतिबन्ध पश्चात् इरानले अमेरिकासँग कुनै पनि प्रकारका वार्तामा बस्न अस्वीकार गर्दै आएको थियो ।
इरानले आफूहरूमाथि अमेरिकाले लगाएका सबै प्रतिबन्ध हटाउनुुपर्ने माग राख्दै आएको छ ।
“इरानविरुद्धको सबै अमेरिकी प्रतिबन्ध हटाउनुपर्ने हाम्रो मुख्य एजेन्डा हो । हाम्रा सर्वोच्च नेताले बारम्बार दोहोर्याए जस्तै योभन्दा बाहेकका विषय सहमति सम्भव छैन,” एक इरानी अधिकारीलाई उदृत गर्दै समाचार संस्था रोयटर्सले जनाएको छ । उनको यो भनाइले मंगलबार हुने भनिएको वार्ता सफल हुनेमा आशंका पैदा गरेको छ ।
अमेरिकी राष्ट्रपति जो बाइडेनको प्रशासन सम्झौतालाई पुनर्जिवित गर्न चाहान्छ । तर यसका लागि वार्ता गर्न आवश्यक रहेको बाइडेन प्रशासनले जनाउँदै आएको छ । रोयटर्स
