काठमाडौं । पर्यटक बोक्ने बसमा स्यानिटाइजरको व्यवस्था नभएको गुनासो यात्रुले गरेका छन् । कोभिड–१९ को दोस्रो लहरको आशंका बढिरहँदा काठमाडौंबाट पोखरा, चितवनलगायत क्षेत्रका लागि छुट्ने पर्यटक बसमै स्यानिटाइजर नभएको गुनासो यात्रुले गरेका हुन् ।
“स्वास्थ्य सुरक्षालाई ध्यानमा राख्दै सबै बसमा स्यानिटाइजर हुने भनिएको थियो । तर, बसमा स्यानिटाइजर राखिएको छैन,” यात्रु राधिका पौडेलले भनिन् ।
यता, पर्यटक बस संघका अध्यक्ष इश्वरप्रसाद उपाध्यायले भने पर्यटकले यात्रा गर्ने बस भएकाले स्वास्थ्य सुरक्षालाई ध्यान दिँदै आएको दाबी गरे । उनले संघ मातहतका सबै बस सञ्चालकलाई अनिवार्य स्यानिटाइजर राख्न भनेको बताए । “संघ मातहतका पर्यटक बसमा स्यानिटाइजर राख्ने गरेका थियौं । कुनै बसले स्यानिटाइजर नराखेका रहेछन् भने भोलिबाटै सुधार गर्छौं” उनले प्रतिबद्धता जनाए ।
गत असोज १ गतेदेखि पर्यटक बस सञ्चालनमा छन् । विदेशी पर्यटक नहुँदा स्वदेशी पर्यटक नै विभिन्न ठाउँमा जाने गरेका छन् । अध्यक्ष उपाध्यायका अनुसार संघमा आवद्ध ३५ वटा पर्यटक बसमध्ये हाल एक दर्जन बसमात्रै सञ्चालनमा ल्याइएको छ । “अहिले विदेशी पर्यटक छैनन् । स्वदेशी पर्यटक नै हुन् । यात्रु कम भएका कारण पालो गरेर १०÷१२ वटा मात्रै बस चलाएका छौं” उनले भने ।
यात्रा गर्ने क्रममा स्वास्थ्य सुरक्षालाई ध्यान नदिइएको पाइए त्यसको जानकारी दिन समेत उनले आग्रह गरे । “यात्रुको सुरक्षाप्रति हामी संवेदनशील छौं । आगामी दिनमा थप सचेत बन्दै सुधार गर्दै जानेछौं” उनले भने ।