काठमाडौं । नेपाली राष्ट्रिय फुटबल टोलीले आइतबारदेखि औपचारिक रुपमा प्रो लाइसेन्सप्राप्त प्रशिक्षक पाएको छ । नेपाली र केही विदेशी प्रशिक्षकबाट प्रशिक्षण लिँदै आएको टोलीले अब प्रो लाइसेन्स होल्डर प्रशिक्षकबाट प्रशिक्षण लिनेछ ।

अखिल नेपाल फुटबल संघ (एन्फा)ले आइतबार पत्रकार सम्मेलनको गरी कुवेती प्रशिक्षक अब्दुल्लाह अलमुताइरीलाई राष्ट्रिय पुरुष फुटबल टोलीको मुख्य प्रशिक्षकको जिम्मेवारी दिएको जनाएको हो ।

नेपाली टोलीलाई यसअघि बालगोपाल महर्जनले प्रशिक्षण दिँदै आएका थिए । उनकै प्रशिक्षकत्वमा नेपालले हालै सम्पन्न त्रिदेशीय फुटबलको उपाधि जितेको हो ।

कतार फुटबल एसोसिएसनले अलमुताइरीलाई नेपाल एक वर्षको प्रशिक्षणका लागि पठाएको हो । ३९ वर्षीय अलमुताइरीले पहिलोपटक राष्ट्रिय टोलीलाई प्रशिक्षण गराउन लागेका हुन् ।

अलमुताइरीले त्रिदेशीय फुटबल पनि हेरेका थिए । त्योभन्दा पहिले पनि आफूले नेपाली खेलाडीको खेल हेरिरहेको उनले बताए । उनले नेपाली टोलीको यू–१९, यू–२३ र राष्ट्रिय टोलीका सबै खेलाडीको खेल हेरेको र उनीहरुले कस्तो खेल्छन् भन्ने विषयमा पनि पूर्ण जानकारी रहेको बताए ।

“मैले नेपाली खेलाडीहरुको खेल हेरेको छु । उनीहरुले कस्तो खेल्दछन् भन्ने विषयमा पनि मलाई राम्रो जानकारी छ । नेपाली राष्ट्रिय टोली मात्र होइन, यू–१९ र यू–२३ का खेलाडी र उनीहरुको खेल क्षमताको बारेमा पनि राम्रो जानकारी छ । नेपाली खेलाडीमा धेरै क्षमता छ । मात्र उपयोग गर्ने समय आएको छ । मैले यो एक वर्षमा सकेजति टिमलाई उत्कृष्ट बनाउने प्रयास गर्नेछु,” अलमुताइरीले पत्रकार सम्मेलनमा भने ।

सन् २०११ मा प्रशिक्षण करियर सुरुवात गरेका अलमुताइरीले अहिले राष्ट्रिय टोलीको जिम्मेवारी पाएका हुन् । उनले सन् २०११ मा कुवेतकै युवा टोली हेर्ने अवसर पाएका थिए । त्यसपछि साउदी अरेबियाका क्लब हुँदै कीर्गिस्तानको यू–१६ टोली सम्हालेका थिए । उनी क्लब करियरमा प्रशिक्षकको महत्वपूर्ण भूमिकामा थिए । उनले कतारको अल शाहनी फुटबल क्लब यू–२३ र कीर्गिस्तान यू–१७ टिमसँग काम गरिसकेका छन् ।

उनले उत्कृष्ट प्रदर्शनमा ध्यान दिइने बताए । “नेपाली टोलीलाई तीन वर्षयता नियाल्दै आएको छु । उनीहरुको प्रदर्शन हेर्नलायक छ । उनीहरुको प्रदर्शन हेर्दा राम्रो क्षमता छ । नेपाली समर्थकलाई मैले कहिले निराश बनाउने छैन,” अलमुताइरीले भने ।

अलमुताइरीले अब नेपालको खेल उत्कृष्ट हुने बताए । उनले डिफेन्सिप र मिडफिल्ड मात्र नभएर सबै पोजिसनलाई सम्हाल्दै राम्रो खेल खेल्नुपर्ने बताए । अब यू–२३, यू–१९ तथा यू–१७ टोलीका खेलाडी सबैको खेल क्षमता नियालेर टिम तयार पार्ने उनको भनाइछ ।

उनले नेपालको टिम फर्मेसन पनि राम्रो बनाउने बताए । “नेपाली फर्मेसन परिवर्तन गर्ने समय आएको छ । पहिलेकोभन्दा फरक तरिकाले खेलाउने मेरो योजना छ । मैले टिमलाई ४–३–३ को फर्मेसनमा खेलाउने योजना बनाएको छु । त्यहीअनुसार टिम तयार गर्नेछु,” अलमुताइरीले भने ।

अलमुताइरीले पछिल्लोपटक अल सहानिया फुटबल क्लबको जिम्मेवारी लिएका थिए । उनले अन्तिम ९ खेलमा प्रशिक्षण दिँदै आठौँ स्थानबाट चौथो स्थानसम्म पुर्‍याएका थिए । आफ्नो प्रशिक्षणमा टोलीले ९ खेलमध्ये चारमा जित, चारमा बराबरी र एक हार व्यहोरेको उनले जानकारी दिए ।

अलमुताइरीले विश्वकप छनोटका तीन खेल र साफ च्याम्पियनसिपमा नेपाली टिम हेर्नेछन् ।