काठमाडौं । सांसदहरुले कृषिमा वैदेशिक लगानी भित्र्याउँदा कुन–कुन क्षेत्रमा भित्र्याउने भन्ने स्पष्ट रुपमा उल्लेख हुनुपर्ने बताएका छन् ।

आइतबार प्रतिनिधिसभाअन्तर्गतको उद्योग, वाणिज्य र श्रम तथा उपभोक्ता हित समितिको बैठकमा बोल्दै सांसदहरुले सरकारले कृषिमा विदेशी लगानी भित्र्याउने निर्णय गर्दा कुन–कुन क्षेत्रमा भित्र्याउने हो, स्पष्ट पार्नुपर्ने बताएका हुन् ।

सरकारले कृषिमा विदेशी लगानी भित्र्याउने भनिए पनि कुन–कुन क्षेत्रमा प्राथमिकता दिने भन्ने स्पष्ट नभएको उनीहरुको भनाइ थियो ।

बैठकमा बोल्दै समिति सभापति विमलप्रसाद श्रीवास्तवले कृषिको कुन–कुन क्षेत्रमा विदेशी लगानी आवश्यक हो, स्पष्ट हुनुपर्ने बताए । स्पष्ट रुपमा विधागत रुपमा छुट्ट्याउनुपर्ने उनले बताए ।

सांसद अमृतादेवी अग्रहरीले नेपालको कृषिमा वैदेशिक लगानी आवश्यक रहेको बताइन् । कृषिमा उत्पादन बढाइ निर्यात गर्नका लागि विदेशी लगानी आवश्यक रहेको उनले उल्लेख गरिन् ।

उद्योग, वाणिज्य तथा आपूर्ति मन्त्रालयका सचिव दिनेश भट्टराईले कृषि उत्पादनलाई आत्मनिर्भर बनाउँदै निर्यातको चरणमा जान ठूलो लगानीको आवश्यकता पर्ने भएकाले कृषिमा विदेशी लगानीको आवश्यकता देखिएको बताए । स्वदेशमै रोजगारी सिर्जना गर्न उद्योगहरु स्थापना गर्नका लागि राज्यले आवश्यकता ठानेर नै कृषिमा विदेशी लगानी भित्र्याउन लागेको उनको भनाइ थियो ।

कृषि तथा पशुपक्षी विकास मन्त्रालयका सचिव प्रेम नारायण कँडेलले नेपालको प्राथमिक उत्पादनलाई हानि नहुने गरी कृषिमा विदेशी लगानी भित्र्याउनुपर्ने बताए । कृषि क्षेत्रमा लगानी गर्न निजी क्षेत्रहरु पनि आकर्षित रहेको सन्दर्भमा त्यसतर्फ पनि ध्यान दिनुपर्ने उनले बताए ।

कृषिमा विदेशी लगानी खुला गर्ने सन्दर्भमा समितिमा सरोकारवाला निकायसँग विभिन्न चरणमा छलफल भइरहेको छ । आगामी बैठकमा अझ विस्तृत रुपमा सम्बन्धित मन्त्रालयका मन्त्रीसहित बसेर छलफल गर्ने निर्णय भएको छ ।