काठमाडौं । भारत सरकारको आर्थिक सहयोगमा काभ्रेमा दुई विद्यालयको निर्माणकार्य सुरु भएको छ ।
काभ्रेको रोशी गाउँपालिकास्थित हरिसिद्धि माध्यमिक विद्यालय र महाभारत गाउँपालिकास्थित सिद्धेश्वर माध्यमिक विद्यालयको पुनर्निर्माणका लागि भूमि पूजा गरिएको हो ।
राष्ट्रिय पुनर्निर्माण प्राधिकरणका सचिव मणिराम गेलाल, भारतीय राजदूतावासको राजनीतिक प्रभागकी प्रथम सचिव सौम्या सी र रोशी गाउँपालिकाका मेयरको उपस्थितिमा भूमि पूजा सम्पन्न भएको दूतावासले जनाएको छ ।
दुई करोड ८४ लाख रूपैयाँको लागतमा हरिसिद्घि माध्यमिक विद्यालयको निर्माण हुनेछ भने सिद्धेश्वर माध्यमिक विद्यालयको निर्माण लागत तीन करोड ९६ लाख रुपैयाँ रहेको जनाइएको छ ।
हरिसिद्धि माध्यमिक विद्यालयको तीनतले नयाँ संरचनामा ९ वटा कक्षाकोठा, प्रयोगशाला, पुस्तकालय र विद्यार्थीहरुका लागि छुट्टा–छुट्टै सरसफाइ संरचनाको सुविधा हुनेछ । त्यस्तै, सिद्धेश्वर माध्यमिक विद्यालयको तीनतले नयाँ संरचनामा १३ वटा कक्षाकोठा, लेखा, प्रधानाध्यापक र अध्यापकका लागि कक्ष, परीक्षा कक्ष, प्रारम्भिक बालविकास कक्ष, प्रशासनिक कक्ष, विद्यालय व्यवस्थापन समिति कक्ष र छात्र तथा छात्राका लागि छुट्टा–छुट्टै सरसफाइ संरचनाको सुविधा हुने जनाइएको छ ।