१
कुन साइतैमा हिँडेंँ यो बाटो
न जल्छ सूर्य, न हुन्छ रातो
फाटेन बादल सुदूरमाथि
छियाछिया यो मनै पो फाट्यो
त्यो जून देख्यौ त्यो फूल देख्यौ
देखेनौ प्रिये ! रगतको टाटो
बुझ्दैनौ साथी गजलको भाषा
लेख्छु रगतले मसीको साटो
हिजो म जस्को थिएँ प्रवक्ता
भन्दै छ उही मलाई लाटो ।
० ० ०
२
आकाश छोडी भासमा छ
‘रवि’ आज त्रासमा छ ।
जोकरहरू महलमा छन्,
‘बादशाह’ तासमा छ ।
मुटुबाट झिक्यो उसले,
ऊ त मेरै सासमा छ ।
डस्बिन हेर्नू, रछ्यान हेर्नू,
इमान त्यतै ह्रासमा छ ।
हिजो यतै थियो खुसी,
कठै ! आज प्रवासमा छ ।
० ० ०
३
हाँसी–हाँसी फुल्छ गुराँस, सधैँ भिरमाथि !
कसले गर्छ चिन्ता यहाँ फूलको पीरमाथि ।
सधैँ वल्लो किनारमा ध्यान रह्यो तिम्रो,
उसको ध्यान रह्यो सधैँ पल्लो तीरमाथि ।
धनमाथि पागल कोही, कोही यौवनमाथि,
हीर पागल राँझामाथि, राँझा हीरमाथि ।
बत्तीमाथि पुतलीको दाह बिर्सेँ मैले,
माछाजस्तै चञ्चले मन पर्यो झीरमाथि ।
यै छ काफी संसारमा मलाई चिनाउन,
राखेको छु सगरमाथा मैले शिरमाथि ।