काठमाडौं । नेपाली आकाशमा उडान गर्दा अन्तर्राष्ट्रिय विमान कम्पनीहरुले दूरसञ्चार सेवा उपयोग गर्न पाउने भएका छन् ।
नेपाल दूरसञ्चार प्राधिकरणको यही चैत ९ गतेको सञ्चालक समितिको बैठकले नेपाली आकाशमा इन्टरनेट सुविधा प्रयोग गर्न दिने निर्णय गरेको प्राधिकरणका प्रवक्ता सन्तोष पौडेलले जानकारी दिए । प्राधिकरणले नागरिक उडड्यन प्राधिकरणसँगको समन्वयमा यो सेवा प्रयोग गर्न अनुमति दिन लागेको हो ।
अब यो सेवा प्राप्त गर्न विदेशी विमान कम्पनीले दूरसञ्चार प्राधिकरणमा निवेदन दिनुपर्ने पौडेलले बताए । “उनीहरुले निवेदन दिनुपर्छ र सर्त पूरा भएको अवस्थामा दूरसञ्चार सेवा प्राप्त गर्न सक्नेछन्,” उनले भने । यो सुविधापछि नेपालमा उडान गर्ने अन्तर्राष्ट्रिय विमान कम्पनीमा यात्र गर्ने यात्रुले इन्टरनेट तथा मोबाइल फोन प्रयोग गर्न पाउनेछन् ।
प्राधिकरणले विमान कम्पनीले माग गरेमा १० हजार फिट उचाइमा उक्त सेवा प्रयोगको अनुमति दिन सक्ने निर्णय भएको पौडेलले बताए । प्राधिकरणका अनुसार अन्तर्राष्ट्रिय नागरिक उडड्यन संगठन (आईकाओ)बाट अनुमतिप्राप्त एयरलाइन्सले यो सुविधा पाउनेछन् ।
यसअघि, दक्षिण एसियाका भारत र अफगानिस्ताले यस्तो सुविधा दिँदै आएका छन् ।