काठमाडौं । महानगरीय ट्राफिक प्रहरी महाशाखाले उपत्यकाको कोरिडर सडक व्यवस्थापनको लागि छुट्टै ट्राफिक प्रहरी टोली खटाएको छ । महाशाखाले आज एक कार्यक्रम गरी कोरिडोर म्यानेजमेन्ट टिम (सीएमटी) परिचालन गरेको जानकारी दिएको हो ।
महाशाखाले काठमाडौं उपत्यकाका मुख्य कोरिडोरहरु विष्णुमती, वाग्मती, धोबीखोला र मनोहरा कोरिडोर सडकको प्रभावकारी व्यवस्थापनका लागि त्यस्तो टोली खटाएको हो । आजदेखि ती करिडोरलाई चौबिस खण्डमा विभाजित गरेर १७ टोली परिचालन गरिएको छ ।
महाशाखाले कोरिडोर सडकहरुमा हुने सवारी चाप व्यवस्थापन, सवारी दुर्घटनामा शीघ्र ट्राफिक परिचालन तथा अव्यवस्थित रुपमा हुने पार्किङलाई नियन्त्रण गर्न छुट्टै टोली परिचालन गरेको महाशाखा प्रमुख एसएसपी जनक भट्टराईले बताए ।
करिडोर सडकको प्रयोगले मुख्य सडकमा हुने सवारी चापमा कमी ल्याउनुको साथै सवारी आवागमन तथा ट्राफिक व्यवस्थापनमा समेत सहजता प्रदान गर्ने महाशाखाको अपेक्षा छ ।