काठमाडौं । बुद्ध एयरले भैरहवा तथा नेपालगञ्जमा थप १ उडान विस्तार गर्न लागेको छ । यससँगै भैरहवामा दैनिक ९ तथा नेपालगञ्जमा ५ उडान हुने बुद्ध एयरले जनाएको छ । यसैगरि केही साताभित्रै धनगढीमा पनि थप १ उडान भर्ने कम्पनीले जनाएको छ ।

बुद्ध एयरले केही समय अगाडि मात्रै एटीआर–७२ जहाज थप गरेको थियो । आउँदो मे महिनामा अर्को एटीआर–७२ जहाज पनि थप्ने बुद्ध एयरका बजार निर्देशक रुपेश जोशीले बताए ।

जहाज थपिएसँगै ९ वटा एटीआर–७२, तीन वटा एटीआर–४२ र २ वटा विच क्राफ्ट गरि १४ जहाज बुद्धसँग हुनेछ ।

बुद्ध एयरले भद्रपुर, तुम्लिङटार, विराटनगर, राजविराज, जनकपुर, सिमरा, भरतपुर, पोखरा, भैरहवा, नेपालगञ्ज, सुर्खेत र धनगढीमा उडान गरिरहेको छ । यी बाहेक पोखराबाट भैरहवा र चितवनको उडान र काठमाडौं, पोखराबाट माउण्टेन फ्लाइट पनि गरिरहेको छ ।