काठमाडौं । हाइड्रोइलेक्ट्रिसिटी इन्भेस्टमेन्ट एन्ड डेभलपमेन्ट कम्पनी (एचआईडीसीएल)ले हकप्रद निष्कासनको अनुमति माग गर्दै नेपाल धितोपत्र बोर्डमा आवेदन दिएको छ ।
कम्पनीले यही चैत १२ गते हाल कायम चुक्ता पुँजीको १ बराबर १ प्रतिशतको अनुपातमा हकप्रद सेयर जारी गर्ने अनुमति माग गर्दै बोर्डमा आवेदन दिएको हो ।
हाल ११ अर्ब रुपैयाँ चुक्ता पुँजी रहेको कम्पनीले १ः१ को अनुपातमा अर्थात् ११ अर्ब रुपैयाँ बराबरको ११ करोड कित्ता हकप्रद सेयर जारी गर्ने अनुमति माग गर्दै बोर्डमा आवेदन दिएको हो ।
कम्पनीले यसअघि पनि हकप्रद सेयर जारी गर्ने भन्दै बोर्डमा आवेदन दिएको थियो । तर, लामो समयसम्म पनि हकप्रद सेयर स्वीकृतिको लागि आवश्यक विवरण उपलब्ध नगराएको भन्दै बोर्डले कम्पनीको हकप्रद प्रस्ताव पाइपलाइनको सूचीबाट हटाएको थियो । त्यसपछि कम्पनीले पुनः हकप्रद सेयर जारी गर्ने अनुमति माग गर्दै बोर्डमा आवेदन दिएको हो ।
कम्पनीले हकप्रद निष्कासनको लागि ग्लोबल आईएमई क्यापिटललाई बिक्री प्रबन्धक नियुक्त गरेको छ । कम्पनीमा नेपाल सरकारको ५० प्रतिशत, नागरिक लगानी कोष, कर्मचारी सञ्चय कोष र राष्ट्रिय बिमा संस्थानको समा १०/१० प्रतिशत गरी ३० प्रतिशत र सर्वसाधारणको २० प्रतिशत सेयर स्वामित्व रहको छ ।