काठमाडौं । युवालाई माल्दिभ्स पठाउने भन्दै ठगी गरेको आरोपमा वैदेशिक रोजगार विभागले सामाखुसीमा रहेको एजेन्टको अखडामा छापा मारेको छ ।

वैदेशिक रोजागारीको लागि युवालाई माल्दिभ्स पठाउने भन्दै प्रलोभनमा पारेको, विदेश पठाउने भनेर पैसा लिएको र फिर्ता नगरेको उजुरी परेको आधारमा छापा मारेको विभागले जनाएको छ ।

उक्त कार्यालयले विभिन्न म्यानपावरहरुसँग मिली विभिन्न देशमा रोजगारीको लागि पठाउने गरेको समेत पाइएको विभागले जनाएको छ ।

विभागको टोली उक्त कार्यालयमा पुग्दा सञ्चालक सुशील खड्का कार्यालयमा थिएनन् । तर, वैदेशिक रोजगारीको चक्करमा आफ्नो पैसा फसेका व्यक्ति भेटिए । उनी अहिले आफ्नो फसेको पैसा उठाउन आफैँ उक्त कार्यालयमा काम गर्ने गरेको समेत पाइएको अनुगमन अधिकृत मातृका सापकोटाले जनाएका छन् ।

विभागको टोलीले उक्त कार्यालयबाट विभिन्न कागजात नियन्त्रणमा लिएको छ ।