दाङ । यातायात मजदुरले गरेको चक्काजामका कारण मंगलबार बिहानैदेखि दाङमा सार्वजनिक सवारीका साधन सञ्चालनमा आउन सकेको छैन ।

नेपाल यातायात स्वतन्त्र मजदुर संगठन जिल्ला कमिटी दाङ, नेपाल यातयात मजदुर संघ इकाइ तुलसीपुर र अखिल नेपाल यातायात मजदुर संघ दाङले संयुक्त रुपमा चक्काजामको आह्वान गरेका हुन् ।

उनीहरुले दुई दिनअगाडि तुलसीपुरमा पत्रकार सम्मेलन गरी मदजुरहरुले तलब–भत्ता र सेवा–सुविधा नपाएको भन्दै अनिश्चितकालीन यातायात बन्द गर्ने चेतावनी दिएका थिए । कोरोना महामारीका कारण लामो समयसम्म मारमा परेको र पछिल्लो समय व्यवसायीहरुको अस्वस्थ प्रतिस्पर्धाका कारण यातायात मजदुरको रोजीरोटी गुम्ने स्थिति आएको हुँदा आन्दोलनमा उत्रनु परेको नेपाल यातायात स्वतन्त्र मजदुर संगठन जिल्ला कमिटी दाङका अध्यक्ष केशवबहादुर भण्डारीले बताए ।

उनीहरुले यातायात मजदुर तथा बुकिङ कर्मचारीहरुले सहज रुपमा तलब–भत्ता पाउनुपर्ने, नेपाल सरकारले जारी गरेको सामाजिक सुरक्षा कोष ऐन, २०७४ सम्बन्धित यातायात प्रालिहरुले लागु गरी कार्यान्वयन गर्नुपर्ने र कार्यान्वयनका लागि नेपाल सरकारले तदारुकता देखाउनुपर्नेलगायत उनीहरुको माग छ ।