काठमाडौं । लगातार तीन दिन बन्द भएर सोमबार खुलेको सेयर बजारमा एकल अंकको सामान्य गिरावट भएको छ । आइतबारको सार्वजनिक बिदापछि आज खुलेको सेयर बजारमा बजार परिसूचक नेप्से ५.४५ अंकले करेक्सन हुँदा २५४३.५२ अंकमा बन्द भएको छ ।

गएको बिहीबार २५४८.९७ अंकमा बन्द भएको नेप्से आज प्रि–ओपनिङ सेसनमा करिब १० अंकले बढेर २५५८.२३ अंकमा खुलेको थियो । कारोबार अवधिभर उतार–चढाव देखिएको बजार परिसूचकले इन्ट्रा–डे कारोबारमा २५६२.२० अंकको उच्च विन्दु र २५३७.६७ अंकसम्म झरेको थियो ।

नेप्सेमा गिरावट भए पनि विकास बैंक, हाइड्रोपावर, वित्त कम्पनी र लघुवित्त कम्पनीको समूहको उपसूचक बढेको छ । लघुवित्त उपसूचक सर्वाधिक ०.८९ प्रतिशत र हाइड्रोपावर उपसूचक ०.८६ प्रतिशतले बढेको छ । वित्त कम्पनी उपसूचक ०.२१ प्रतिशत र विकास बैंक उपसूचक ०.०५ प्रतिशतले बढेको छ ।

यता, व्यापार उपसूचक ५.२६ प्रतिशतले आरालो लाग्दा होटेल एन्ड टुरिजम उपसूचक भने सर्वाधिक ४.१४ प्रतिशतले घटेको छ । यस्तै, अन्य उपसूचक  १.०८ प्रतिशत र बजारलाई लिड गर्ने बैंकिङ उपसूचक ०.४६ प्रतिशतले घटेको छ ।

बजार परिसूचकमा सुस्तता देखिँदा कारोबार रकममा पनि सुस्तता देखिएको छ । बिहीबार साढे ६ अर्बको कारोबार भएको नेप्सेमा आज भने करिब साढे ४ अर्बमा सीमित भएको छ । नेप्सेमा आज ६४ हजार ५१५ कारोबारमा  २०९ कम्पनीको ९१ लाख ३८ हजार ९३५ कित्ता सेयर किनबेच हुँदा ४ अर्ब ४१ करोड ३ लाख ४५ हजारको कारोबार भएको छ ।

कारोबार रकमको नेतृत्व नेपाल इन्फ्रास्ट्रचर बैंकले लिएको छ । बैंकको ४४ करोड ३१ लाख ६५ हजारको कारोबार हुँदा अपर तामाकोसीको ३८ करोड ७७ लाख ९८० हजारको कारोबार भएको छ ।

यस्तै, लगातार १५७ रुपैयाँ ओपनिङ कारोबार भएर लगातार रुपमा बढ्दै गएको चन्द्रागिरि हिल्समा आज भने बिक्री चान बढी हुँदा सेयर मूल्य आरालो लागेको छ भने ३७ करोड ७ लाख ७६ हजारको कारोबार भएको छ । कम्पनीको सेयर मूल्य सर्वाधिक ७.१७ प्रतिशतले घटेको छ ।

यता, उन्नति सहकार्य लघुवित्त, अजोड इन्स्योरेन्स र महिला लघुवित्तको सेयर मूल्यमा भने सकारात्मक सर्किट लागेको छ ।