लिमा । पेरूमा इन्धन बोकेर सडकमा गुडिरहेका ट्यांकर विस्फोट हुँदा सडक छेउछाउमा रहेका कैयौँ व्यक्तिको मृत्यु भएको हुन सक्ने पेरूको प्रहरीले जनाएको छ ।

पेरूको राष्ट्रिय राजमार्ग प्रहरी प्रमुख एर्लिन सिल्भाले घटनाको पुष्टि गरेका छन् । घटनामा कति व्यक्तिको ज्यान गएको हो भन्नेबारे अझै यकिन विवरण सार्वजनिक नभएको उनले बताए ।

स्थानीय समयानुसार शनिबार एक पेरूभियाली टेलिभिजनसँगको अन्तर्वार्तामा उनले घटनाको विवरण दिँदै भने, “सडकमा इन्धन बोकेर गुडिरहेको ट्यांकरमा सडकमाथिबाट आएको एउटा चट्टानले सँगै रहेका ६ मध्ये पहिलो ट्यांकरमाथि लागेपछि ट्यांकरबाट इन्धन चुहेको र उक्त ट्यांकरमा आगलागीपछि विस्फोट भएको र क्रमशः अन्य ट्यांकरमा पनि आगलागी र विस्फोट भएको प्रत्यक्षदर्शी स्थानीयले बताएका छन् । घटनाबारे अनुसन्धान सुरू भइसकेको छ ।”

घटनास्थल राजधानी लिमाबाट ८६ किलोमिटर टाढाको राजमार्गमा भएको हो । आगलागी नियन्त्रण र बस्तीमा फैलिन नदिनका लागि १० दमकल घटनास्थलमा पुगी निरन्तर काम गरिरहेको बताइएको छ ।

विस्फोटका कारण राजमार्गमा गुडिरहेका कार तथा अन्य गाडीहरूमा पनि असर परेको बताइएको छ । तर, कति व्यक्तिको मृत्यु भएको वा घाइते भएको भन्ने विवरण अझै आइसकेको छैन ।

पेरूको यातायात तथा सूचना मन्त्रालयले आफ्नो ट्विटरमार्फत उक्त क्षेत्रमा गाडी तथा मानवीय आवत-जावतलाई तत्कालका लागि रोकिएको र सवारी चालकहरूलाई सावधानी अपनाउन आग्रह गरेको छ । रासस/सिन्ह्वा