जकार्ता । इन्डोनेशियाको एक  चर्चबाहिर आत्मघाती बम हमला हुँदा १४ जना घाइते भएका छन् । आज आइतबार इस्टर सप्ताहको पहिलो दिन मकसार शहरमा रहेको उक्त क्याथोलिक चर्चमा आत्मघाती बम हमला भएको यहाँको प्रहरीले जनाएको छ ।

चर्चका पादरी विल्हेमस तुलकका अनुसार एक संदिग्ध आक्रमणकारीले मोटरसाइकल चर्चमा छिराउन लागेको थियो । तर उसलाई सुरक्षाकर्मीले प्रवेश गर्नबाट रोकेको बताइएको छ ।

स्थानीय प्रहरीले हमलामा एक जनाको मात्र संलग्नता रहेको बताए पनि दुईजना संलग्न रहेको यहाँको केन्द्रीय प्रहरीले जनाएको छ ।
अहिलेसम्म हमलाको जिम्मेवारी कुनै समूहले लिएको छैन । 

हमला चर्चको मुख्य द्वारभित्र नभएकाले ठूलो क्षति हुन नपाएको समाचार संस्था रोयटर्सले जनाएको छ ।