काठमाडौं । मेलम्चीको पानी आजदेखि काठमाडौंका धारा–धारामा वितरण गरिने भएको छ । २०५६ सालदेखि मेलम्ची खानेपानी विकास समिति गठन भएर आयोजनाको काम हुँदै आएको थियो ।
मेलम्चीको पानी वितरणका लागि राजधानीका तीन ठाउँका ट्यांकीमा पानी भरिँदै छ । काठमाडौं उपत्यका खानेपानी लिमिटेडल (केयूकेल)का अनुसार पुरानै पाइपबाट पानी घर–घरमा छाड्न लागिएको हो ।
केयूकेएलका प्रवक्ता प्रकाशकुमार राईका अनुसार आज बिहान १० बजेदेखि अनामनगर, मीनभवन र महाँकालका ट्यांकीमा पानी भर्न सुरु गरिएको छ । ‘‘ट्यांकी भरिन चार घण्टा लाग्छ । त्यसपछि परीक्षणका लागि धारामा पानी पठाउँछौँ । अहिले हामी परीक्षणकै चरणमा छौँ । केयूकेएलका यी ठाउँमा रहेका पुराना ट्यांकीमार्फत पानी वितरण गर्ने योजना छ,” उनले भने, ‘‘महाँकालचौर, अनामनगर, मीनभवन, महाराजगन्ज, बाँसबारी, बालाजुलगायत ठाउँका पुरानै ट्यांकीमा पानी भरी घर–घरमा पठाउन लागेका हौँ । सडकमा पानी चुहावट र ढल मिसिने समस्या आएमा पानी पठाउन रोकिनेछ ।”
धारामा पानी सहजै जाने र सडकमा पानी चुहावट नहुने अनुमान गरिएको उनको भनाइ छ । ‘‘सबै धारामा एकैचोटी पानी आउँदैन । हामीले सिफ्ट मिलाएर पठाउँछौँ । ट्यांकीमा पानी भर्ने काम भइरहेको छ । यी ट्यांकीबाट चार करोड लिटर पानी वितरण गर्ने तयारी थालेका छौँ,” उनले भने, ‘‘त्यसैले पनि पानी चुहावट र सडक जलमग्न हुने जोखिम कम छ ।”
प्रवक्ता राईका अनुसार परीक्षणका लागि सकेसम्म पानी निरन्तर छाडिनेछ । मेलम्चीबाट सुन्दरीजलमा १७ करोड लिटर पानी छाडिने भए पनि अहिले कम पानी वितरण गर्ने योजना केयूकेएलको छ ।
केयूकेएलका कार्यकारी निर्देशक मिलन शाक्य क्षमताअनुसार सुरुङमा पानी नछाडिएको बताउँछन् । ‘‘हामीले अहिले चार करोड लिटर पानी वितरण गर्न लागेका छौँ । काठमाडौंमा अहिले ४३ करोड लिटर पानीको माग छ । विस्तारै पानीको आपूर्ति पूरा गर्ने योजना बनाएका छौँ,” उनले भने ।
पानी सफा भएर धारामा जाने केयूकेएलको दाबी छ । उनले भने, “सुन्दरीजलको प्रशोधन केन्द्रमा पानी चलाइएको छ । आजदेखि पाँच दिनसम्म दैनिक चार करोड लिटरका दरले पानी पठाइनेछ । त्यसपछि पानीको परिमाण बढाउँदै लैजाने छौँ ।”
