विराटनगर । नेपाल–भारतकोे जोगबनी नाका छिर्ने साविकको मुख्यद्वार बन्द छ । नेपालतर्फको एक नम्बर, दुई नम्बर र तीन नम्बर ढाटमा ताल्चा लगाइएको छ । अघिल्लो वर्ष चैतमा सुरु भएको लकडाउनदेखि नै ढाट बन्द गरिएको हो । 

ढाट पारि भारतका सुरक्षाकर्मी र नेपालपट्टीको पालमा सशस्त्र र जनपद प्रहरीका जवानले २४ घण्टा पहरा दिइरहेका छन् ।

टेबुलमा रजिस्टर राखिएको छ । त्यसमा भारतबाट नेपालतर्फ प्रवेश गर्ने नागरिकको अभिलेख राखिन्छ । 

एक नम्बर गेट नजिकै उत्तरपट्टी विश्व स्वास्थ्य संगठन (डब्लुएचओ) ले उपलब्ध गराएको पाल मुनि एकजना नेपाली स्वास्थ्यकर्मी बसेकी छन् । 

भारतबाट जोगबनीको मुख्य नाका भएर बिरलै आउने नेपाली र भारतीय नागरिकको त्यहाँ ज्वरो जाँचिन्छ । आवश्यक परे एन्टिजेन परीक्षण गर्न नमूना लिइन्छ । तर, सानो संख्यामा मानिस आउने भएकोले ज्वरोसम्म परीक्षण हुँदै आएको छ ।

नाकाको मुख्य प्रवेशद्वारमा नेपाली सुरक्षाकर्मीले नेपाल प्रवेश गर्नेको दैनिक अभिलेख राख्ने गरेको छ । यो तथ्यांकका अनुसार मुख्यद्वारबाट दैनिक दशजना जति मानिस नेपालतिर आएको देखिन्छ । तर, त्यसको ठिक चार सय मिटर जति उत्तरपट्टी भने भारतबाट नेपाल आउने र नेपालबाट भारततिर छिर्नेको लर्केताँत नै लाग्ने गरेको छ । 

जिल्ला प्रहरी कार्यालयको प्रहरी बिटसँगै जोडिएको उत्तरपट्टीको सडकमा टाउकोमा पोकापन्तुरा बोकेका मानिसको जुलुस नै देखिन्छ । नेपालतिरबाट यसरी नै भारत जानेहरुको संख्यामा पनि कुनै कमी छैन । हुलास मेटल क्राफ्ट उद्योग पश्चिमको विराटनगर जुट मिल्स लिमिटेडको भित्ता नजिकैको सडकबाट भरिभराउ छ । कोरोनाको संक्रमण फैलन नदिन नेपाल सरकारले जारी गरेको स्वास्थ्य सम्बन्धी मापदण्ड सीमामा लागू भएको देखिएको छैन । 

दिउँसो भारतबाट नेपाल छिर्ने ‘चोरबाटो’ भनिने मटेरुवा पुग्दा मानिसको आऊजाऊ बाक्लिदो देखिएको थियो । टिकुलिया वस्ती र इस्लामपुरतिर पनि ठूलो घुइँचो देखिन्छ । मानिस आउजाउ गर्ने क्रम दैनिक बाक्लिँदो छ । जोगबनी सीमामा नेपाल सरकारले मुख्य नाकाको ढाट खोलेको छैन । तर, मानिसहरु छेउका सहायक र चोरबाटो प्रयोग गरिरहेका छन् । 

यसरी आउनेहरुको अभिलेख राख्ने र स्वास्थ्य परीक्षण गर्ने काम हुन सकेको छैन । जोगबनी नेपालीहरुको किनमेलको पहिलो रोजाइको बजार भएकोले विराटनगरसहित विभिन्न ठाउँबाट नेपालीहरु जाने गर्छन् । यसरी आउजाउ गर्दा भारतबाट कोरोनाको संक्रमण नेपालतर्फ फैलने खतरा देखिएको छ । विराटनगर महानगरपालिकाको जनस्वास्थ्य महाशाखाका निरीक्षक डा. दिलिपकुमार यादवले सीमाबाट हुने निर्वाध आउजाउले संक्रमणको जोखिम बढेको बताए ।

भने,“भारतमा फेरि संक्रमण फैलन शुरु भएकोले त्यो सरेर यता पनि आउने अधिक सम्भावना छ ।” विराटनगरमा पछिल्लो पटक दैनिक जसो मानिसहरुमा संक्रमण देखिन सुरु भएको छ । 

भारतका सीमावर्ती क्षेत्रहरुमासमेत कोरोनाको संक्रमण फैलन सुरु भएकोले सरकारले सचेत हुन आग्रह गरेको छ । नजिकिएको होली पर्वलाई समेत मध्यनजर गरी जिल्ला प्रशासन कार्यालय मोरङले भिडभाड नगर्न र स्वास्थ्य मापदण्ड पलना गर्न नागरिकमा आग्रह गरेको छ । 

प्रमुख जिल्ला अधिकारी कोषहरि निरौलाले संक्रमणको जोखिमका कारण होलीमा समेत धेरै भिडभाड गर्न नहुने बताए ।

भने,“भिड नगर्न र स्वास्थ्य सम्बन्धी मापदण्ड पालना गर्न सर्वसाधरणमा अपिल गरेका छौं ।”