येरुसेलम । इजरायलले आफ्नो ९३ लाख जनसङ्ख्यामा आधा भन्दा बढी नागरिकहरुलाई कोभिड विरुद्ध दुईवटै डोज खोप लगाइसकेको बिहिबार त्यहाँको स्वास्थ्य मन्त्रालयले जनाएको छ । खोप अभियान तिव्र रुपमा लागू गराउन सक्नुले नै देशलाई सो सफलता दिलाएको बताइएको छ ।
इजरायलमा फाइजर खोपको वितरण गत डिसेम्बर देखि नै सुरु गरिसकिएको थियो । यसमा १६ वर्ष भन्दा माथिको उमेरका सबैलाई खोप लगाउन योग्य ठहर गरिएको थियो । संक्रमण दर लगातार घटिरहेको तथ्याङ्क उल्लेख गर्दै स्वास्थ्य मन्त्री युली एडलस्टाइनले यो खुसीको खबर सुनाएका हुन् । त्यस्तै उनले कोरोनाको अर्को लहर सुरु हुन नदिन सबै नागरिकहरुमा सुरक्षाका उपाय अपनाइरहन समेत आग्रह गरेका हुन् ।
इजरायलले पूर्वी येरुसेलमका प्यालेस्टिनी नागरिकहरुलाई पनि आफ्नै जनङ्ख्या मानेको छ र खोप प्रदान गरिरहेको छ । यसले इजरायलमा काम गर्ने प्यालेस्टाइनका नागरिकलाई पनि खोप अभियानमा सहभागी गराउने निर्णय गरेको हो । उता प्यालेस्टाइनको स्वास्थ्य निकायले चाहिँ एकदम सिमित रुपमा वेस्ट ब्यांक र गाजा क्षेत्रमा खोप कार्यक्रम आयोजना गरेको छ । जसमा इजरायल, रुस, युएइ र संयुक्त राष्ट्र संघको कोभ्याक्स कार्यक्रमबाट अनुदान आएका खोपहरु प्रयोग गरिएको छ ।
रोयटर्स