काठमाडौं । साताको अन्तिम कारोबार दिन सेयर बजारमा दोहोरो अंकको करेक्सन भएको छ । सातको पहिलो दिन आइतबारदेखि नै उतार–चढाव देखिएको बजारमा अन्तिम दिन पनि उतार–चढावका बीच बजार परिसूचक नेप्से २१.२९ अंकले करेकसन हुँदा २५४८.९६ अंकमा बन्द भएको छ ।
बुधबार करिब २ प्रतिशत अर्थात् ४२ अंकले बढेको नेप्सेमा आज साताको अन्तिम कारोबार दिनमा भने करेक्सन भएको हो । नेप्सेसँगै ‘क’ वर्गका कम्पनीहरुलाई मापन गर्ने सेन्सिटिभ इन्डेक्समा पनि करेक्सन भएको छ । सेन्सिटिभ इन्डेक्स ५.६४ अंकले घटेर ४५०.३१ अंकमा बन्द भएको छ ।
नेप्सेमा करेक्सन हुँदा व्यापार, होटेल तथा पर्यटन र लगानी उपसूचकबाहेक सबै उपसूचक राताम्यै भएका छन् । होटेल तथा पर्यटन उपसूचक सर्वाधिक ४.४५ प्रतिशत, व्यापार उपसूचक ३.९४ प्रतिशत र लगानी उपसूचक १.१६ प्रतिशतले बढेको छ ।
सर्वाधिक घट्नेमा भने हाइड्रोपावर उपसूचक रहँदा अन्य उपसूचकले पछ्याएको छ । हाइड्रोपावर उपसूचक १.८९ प्रतिशत, अन्य उपसूचक १.८८ प्रतिशत र बजारलाई लिड गर्ने बैंकिङ उपसूचक पनि १.१ प्रतिशतले घटेको छ । यस्तै, लघुवित्त उपसूचक १.०२ र जीवन बिमा उपसूचक ०.९९ प्रतिशतले घटेका छन् ।
बजार परिसूचकमा करेक्सन भए पनि कारोबार रकम भने बुधबारको हाराहारीमै पुगेको छ । बुभबार ६ अर्ब ६७ करोडको कारोबार भएको बजारमभा आज पनि साढे ६ अर्बमाथिको कारोबार भएको छ । ७४ हजार ६५८ पटकको कारोबारमा २०८ कम्पनीको १ करोड २५ लाख ४८ हजार १४६ कित्ता सेयर किनबेच हुँदा ६ अर्ब ५० करोड ८ लाख ६ हजारको कारोबार भएको छ ।
कारोबार रकममा नेपाल इन्फ्रास्ट्रचर बैंकले लिड गरेको छ । बैंकको सर्वाधिक ९१ करोड ८ लाख ८१ हजारको कारोबार भएको छ । यस्तै, अपर तामाकोसीको २६ करोड ९७ लाख ७२ हजार र सिद्धार्थ इन्स्योरेनसको २३ करोड ५१ लाख २२ हजारको कारोबार भएको छ ।
नेप्सेमा करेक्सन हुँदा पनि चन्द्रागिरि हिसको सेयर मूल्य बढ्नेक्रम भने रोकिएको छैन । माघ २३ गते नेप्सेमा सूचीकरण भएर माघ २३ बाट कारोबार सुरु भएको कम्पनीको सेयर मूल्य लगातार बढिरहेको छ । १५७ रुपैयाँमा ओपनिङ कारोबार भएको कम्पनीको सेयर मूल्य आज १० प्रतिशतले बढेर २ हजार ७९ रुपैयाँ पुगेको छ । त्यसबाहेक आज नेप्सेमा सपोर्ट माइक्रोफाइनान्स र वोमी लघुवित्तको सेयर मूल्यमा पनि सकारात्मक सर्किट लागेको छ ।
नेपाल बंगलादेश बैंकको सेयर मूल्य भने सर्वाकि ६ प्रतिश माथिले घटेको छ ।
