काठमाडौं । नेपाली फुटबलप्रेमीमाझ परिचित नाम हो, विराज महर्जन । घरेलु तथा अन्तर्राष्ट्रिय फुटबलमा बेग्लै पहिचान बनाएका विराज अन्तर्राष्ट्रिय फुटबलबाट सन्न्यास लिने योजनामा छन् ।
दशरथ रंगशालामा जारी त्रिदेशीय प्रतियोगिताबाट सन्न्यास लिने उनको तयारी छ । विराज घरेलु भूमिमा अन्तिम अन्तर्राष्ट्रिय खेल खेल्न चाहन्छन् । सन् २००८ बाट अन्तर्राष्ट्रिय फुटबलको यात्रा थालेका उनले त्यसपछि पछाडि फर्केर हेर्न परेन ।
विराजले लकडाउनअघि एकताका सन्न्यास लिने योजना बनाएका थिए । लिएनन् । पछि फेरि अन्तर्राष्ट्रिय खेल खेलेरै अन्तर्राष्ट्रिय फुटबलबाट विश्राम लिने सोचे । उनको त्यो योजना विश्वकप फुटबलको छनोट खेलबाट पूरा हुने तरखरमा थियो । तर, विश्वकप छनोट खेल्न नपाउने भएपछि सन्न्यासको योजना सर्यो ।
“अन्तर्राष्ट्रिय फुटबलबाट सन्न्यास लिने मेरो योजना थियो । बीचमा केही समय टिममा परिनँ । टिममा नपर्दा एकताका सन्न्यास लिऊँ झैँ भएको थियो । तर, खेल्ने आँट भने अझै मरेको थिएन । मिहिनेत गरेँ । प्रशिक्षकले टिममा मौका दिनुभयो । अहिले घरेलु मैदानमा नै हुने प्रतियोगिताबाट सन्न्यास लिने भएको छु,” विराजले बाह्रखरीसँग भने ।
विराजलाई पछिल्लोपटक राष्ट्रिय टोलीमा राखिएको थिएन । अन्तर्राष्ट्रिय तथा राष्ट्रिय फुटबलमा उपाधि जितेका कारण विराज सफल कप्तान भनेर चिनिन्छन् । उनको कप्तानीमा नेपालले दुई ठूला उपाधि जितिइसकेको छ । बंगबन्धु गोल्डकप र १२औँ सागमा फुटबलको स्वर्णपदक नेपालले विराजकै कप्तानीमा जितेको थियो ।
“मैले आफ्नो फुटबल करियरमा नेपालका लागि धेरै सफलता दिलाएको छु । नेपाली टोली र घरेलु दर्शकले पनि मलाई धेरै कुरा दिनुभएको छ । दर्शक र नेपाली फुटबल मेरो फुटबल करियरको मुख्य विन्दु हुन् । उनीहरुसँगै अन्तर्राष्ट्रिय फुटबलबाट सन्न्यास लिन पाउनु मेरो लागि खुसीको कुरा हो । दर्शक र अन्तर्राष्ट्रिय फुटबलबाट टाढा हुनु मेरो लागि पीडाको कुरा पनि हो,” उनले भने ।
नेपाली सिनियर फुटबल टिमले करिब ६ वर्षपछि दशरथ रंगशालामा फुटबल खेल्दै छ । विराज टिममा छन् । प्रशिक्षकले राम्रो अवसर दिएको विराज बताउँछन् । घरेलु दर्शकमाझ अन्तर्राष्ट्रिय फुटबलबाट सन्न्यास लिन पाउनु सुखद् पक्ष भएको उनको भनाइ छ ।
उनका अनुसार सन्न्यास लिने समयमा प्रशिक्षकले उनलाई कप्तानीको अवसर पनि दिने बताएका छन् । आफूलाई टिमका सहकर्मीहरुले पनि लामो समय साथ दिएको र उनीहरुसँगै खेलेर अन्तर्राष्ट्रिय फुटबलबाट सन्न्यास लिन पाउने कुराले खुसी बनाएको विराज बताउँछन् ।
“लामो समय फुटबलमा बिताएँ । फुटबलका सबै कुराहरु मिस हुनेछन् । फुटबल, समर्थक, मैदानदेखि मैदानबाहिर फुटबल समर्थकको माया । उनीहरुसँगको सम्बन्ध आदि सबै कुराले मलाई याद दिलाइ रहनेछ । किनकि, आजसम्म म जे छु, त्यो फुटबलले नै दिएको हो,” विराजले भने ।
क्लब करियर
वि.सं. २०७६ मा मच्छिन्द्र क्लबले ‘ए’ डिभिजन लिग जित्दा विराज महर्जन मुख्य खेलाडी थिए । लिगमा उत्कृष्ट प्रदर्शन गर्दै टिमलाई उपाधि दिलाए । मनाङ–मर्स्याङ्दी क्लबबाट उनी मच्छिन्द्र पुगेका हुन् ।
सन् २००७ मा घरेलु क्लब थ्रीस्टारबाट लिग खेलेका उनले सन् २०१२÷१३ मा थ्रीस्टारबाट लिग जित्न सफल भए । उनको क्लब यात्रा थ्रीस्टारबाटै सुरु भएको थियो ।
विराज सन् २०१६ मा मनाङ–मर्स्याङ्दीमा अनुबन्ध भए । ०७५ सालमा मनाङको लागि लिग उपाधि जिते । ०७६ मा मच्छिन्द्र पुगे । क्लब करियरमा भने विराजलाई अझै केही समय देख्न पाइनेछ ।
