दमास्कस । दक्षिण–पश्चिम सिरियामा सरकारी सेनाको आक्रमणमा एक बालकसहित कम्तिमा ६ नागरिकको मृत्यु भएको छ । अतरिब सहरमा आइतबार भएको आक्रमणमा ५ स्वास्थ्यकर्मीसहित १६ जना घाइते भएका इन्टरनेशनल रेस्क्यु कमिटी (आईआरसी)लाई उदृत गर्दै अलजजिराले जनाएको छ ।
घाइतेहरुमध्ये ६ जनाको अवस्था गम्भीर रहेको जनाइएको छ । आक्रमणपछि अस्पतालको सेवा बन्द भएको छ । सन् २०२० मार्चमा रुस र टर्कीबीच युद्धविराम घोषणा भए पनि यो आक्रमण भएको समाचारमा उल्लेख गरिएको छ ।
यहाँको स्वास्थ्य क्षेत्र लक्षित गरी भएको यो पाचौं आक्रमण हो । सन् २०१९ को पहिलो महिनादेखि हालसम्म स्वास्थ्य क्षेत्रमा भएको आक्रमणको संख्या ११८ पुगेको छ ।
“स्वास्थ्य सेवालाई अन्तर्राष्ट्रिय कानुनले संरक्षण गरेको छ र यसलाई संकटको समयमा ‘स्वर्ग’का रुपमा लिइन्छ,” सिरियास्थित आईआरसीका निर्देशक रेहाना जवारले भनेका छन्, “तर युद्ध समाप्त भएको १० वर्षपछि पनि सिरियामा यस्तो अवस्था छैन । स्वास्थ्य सेवामा अहिलेसम्म झण्डै ६ सय आक्रमणका घटना दर्ता भएको छ ।”
यो महिनाको सुरुमा आईआरसीले एक रिपोर्ट सार्वजनिक गर्दै अस्पतालहरु कसरी सुरक्षित क्षेत्रबाट खरतनाक क्षेत्रमा परिणत भए भन्ने कुरा प्रष्ट पारेको थियो । रिपोर्टअनुसार यहाँका ७० प्रतिशत स्वास्थ्यकर्मीले देश छाडेका छन् भने झण्डै कुल संख्याको आधा अस्पतालहरु मात्र सञ्चालनमा छन् । एक चिकित्सकले दश हजार सिरियाली नागरिकलाई सेवा दिइरहेका रिपोर्टमा जनाइएको छ ।