जेरुसेलम । निर्वाचन नजिकिँदै गर्दा इजरायलका प्रधानमन्त्री बेन्जामिन नेतान्याहुको विरुद्धमा प्रदर्शन चर्किएको छ । निर्वाचनको तीन दिनअघि नेतान्याहुविरुद्ध यहाँका नागरिकले प्रदर्शन गरेका हुन् ।
करिब २० हजार इजरायली नागरिक प्रदर्शनमा सहभागी भएको समाचार संस्था रोयटर्सले जनाएको छ । प्रदर्शनकारीले सडकमा ड्रम ठटाएर र हर्न बजाएर ७१ वर्षीय नेतान्याहुलाई विस्थापन गर्नुपर्ने भन्दै नारा लगाएका थिए ।
यही मार्च २३ तारिखमा तय भएको निर्वाचनमा यहाँको लिकुड पार्टी सबैभन्दा ठूलो पार्टीका रुपमा चुनिने प्रारम्भिक मतसर्वेक्षणले देखाएको छ । यद्यपि, संसद्मा स्पष्ट बहुमत भने कुनै पार्टीले नल्याउने अनुमान गरिएको छ । यसअघि भएको तीन निर्वाचनमा पनि कुनै दलले बहुमत ल्याउन सकेका थिएनन् ।
नेतान्याहुविरुद्ध भ्रष्टाचार र पदको दुरुपयोगलगायतका विषयमा मुद्दा दायर भएको छ । यद्यपि, उनले सरकारले चलाएको कोरोनाभाइरसविरुद्धको खोप कार्यक्रमले निर्वाचनमा आफ्नो पार्टीले बहुमत ल्याउने दाबी गर्दै आएका छन् ।