बीबीसी । भारतको मुम्बइ सहरमा भीडभाडयुक्त क्षेत्रहरुमा अनिवार्य कोभिड परीक्षण गराइने भएको छ । पछिल्लो समय तिव्र रुपमा फैलिरहेको भाइरस नियन्त्रण गर्न सरकारले विभिन्न कडाइ अपनाइरहेको छ । महाराष्ट्रको स्थानीय सरकारका अनुसार शपिङ सेन्टर र ट्रेन स्टेसन जस्ता ठाउँहरुमा अब नियमित ‘र्यापिड टेस्ट’ गराइनेछ । यसमा कसैले टेस्ट गर्न अस्वीकार गरेमा त्यसलाई कानुन उल्लंघन मानिने बताइएको छ । 

शनिबार भारतमा एकैदिन ४० हजार ९५३ कोरोना बिरामी फेला पारिएको थियो । जुन चार महिनाकै उच्च तथ्याङ्क हो । हालसम्म त्यहाँ १ लाख ५९ हजारले कोरोनाका कारण ज्यान गुमाइसकेका छन् । कोरोनाका १ करोड १५ लाख बिरामी भएको भारतमा पछिल्ला केही हप्ता संक्रमण दर लगातार वृद्धि भइरहेको छ । खोप अभियान जारी छ भने नयाँ बढी संक्रामक किसिमको भाइरस पहिचान गर्न पनि देश संघर्षरत छ । 

सहरका अधिकारीहरुले बताए अनुसार २२ मार्चदेखि भीडभाडयुक्त क्षेत्रमा र्यापिड टेस्ट अनिवार्य हुनेछ । अब नागरिक मुम्बइको व्यस्त ठाउँ प्रवेश गर्नासाथ स्वाब दिनका लागि तयार भएर बस्नुपर्ने स्थानीय निकायका अधिकारीले इन्डिया टुडेसँग बताएका हुन् । यसमा शपिङ सेन्टरमा बाहेक सबै ठाउँमा कोभिड परीक्षण निःशुल्क गरिनेछ । शपिङ सेन्टरहरुमा व्यक्तिगत भुक्तानी गर्नुपर्ने बताइएको छ । परीक्षण गर्न नमान्नेहरु माथि कस्तो कारबाही हुनेछ भन्ने स्पष्ट पारिएको छैन ।
 
स्थानीय निकायले यसका लागि र्यापीड एन्टिजेन टेस्टको प्रयोग गर्ने बताइरहेका छन् तर यसअघिका रिसर्चहरुमा यो परीक्षण विश्वसनीय नहुने देखिएको थियो र कहिलेकाहिँ गलत नतिजा पनि देखाउन सक्ने बताइएको छ । 

भारतमा अहिले बढिरहेको संक्रमण दरका लागि मानिसहरुको लापरबाहीलाई जिम्मेवार ठहर्याइएको छ । कोभिड विरुद्धको सुरक्षाका उपायहरु अपनाउन छाडेकाले नै संक्रमण तिव्र रुपमा फैलिरहेको विज्ञहरुले बताएका छन् । महाराष्ट्र जस्तैगरी केरेला, पन्जाब, कर्नाटक, गुजरात, तामिलनाडु, हर्याना र मध्य प्रदेशमा पनि बिस्तारै भाइरस फैलने क्रम बढिरहेको तथ्यांक छ । यसबीच विभिन्न क्षेत्रमा लकडाउन, स्कुल, रेस्टुरेन्टहरु बन्द गर्नेलगायत नियम अपनाउन थालिसकिएको छ भने अन्य स्टेटहरु यसबारे विचार गरिरहेका छन् । 

भारतमा ४ करोड बढीले कोरोना खोपको कम्तिमा एउटा डोज लगाइसकेका छन् जसमा अहिले विशेषगरी जेष्ठ नागरिक र स्वास्थ्य समस्या भएकाहरुलाई प्राथमिकतामा राखिएको छ । सरकारले जुलाइको अन्त्यसम्ममा २५ करोडको समूहमा रहेका यी संवेदनशील वर्गमा खोप लगाइसक्ने लक्ष्य राखेको छ ।