काठमाडौं । सिंगटी हाइड्रो इनर्जी लिमिटेडले आजबाट सर्वसाधारणमा धितोपत्रको प्रारम्भिक निष्कासान सार्वजनिक (आईपीओ) बिक्री गर्ने भएको छ । पहिलो चरणमा आयोजना प्रभावित दोलखाका स्थानीयलाई आईपीओ बिक्री गरिसकेको कम्पनीले दोस्रो चरणमा सर्वसाधारणको लागि आईपीओ बिक्री गर्न लागेको हो ।
कम्पनीले प्रतिसेयर १०० रुपैयाँ अंकित मूल्यका २९ लाख कित्ता साधारण सेयर बिक्री खुला गर्न लागेको हो । जसमध्ये ५ प्रतिशत अर्थात् १ लाख ५४ हजार कित्ता सामूहिक लगानी कोषका लागि र २ प्रतिशत अर्थात् ५८ हजार कित्ता कर्मचारीको लागि सुरक्षित गरिएको छ । बाँकी रहेको २६ लाख ९७ हजार कित्ताका लागि सर्वसाधारणले आवेदन दिन सक्नेछन् ।
कम्पनीले नेपाल धितोपत्र बोर्डबाट जारी १ अर्ब ४५ करोडको १० प्रतिशत स्थानीय आयोजना प्रभावित र २० प्रतिशत सर्वसाधारणको लागि बिक्री गर्ने अनुमति पाएको थियो । जसअनुसार कम्पनीले यसअघि नै आयोजना प्रभावित क्षेत्र दोलाखाको बिगु र कालिञ्चोक गाउँपालिकाका स्थानीयको लागि सेयर बिक्री गरेको थियो । कम्पनीले स्थानीय आयोजना प्रभावितको लागि १४ करोड ५० लाख रुपैयाँ बरारबको १४ लाख ५० हजार कित्ता सेयर बिक्री गरेको हो ।
मेगा क्यापिटल मार्केट लिमिटेड बिक्री प्रबन्धक रहेको कम्पनीको आईपीओमा सर्वसाधारणले छिटोमा चैत १० गतेसम्म आवेदन दिन सक्नेछन् । उक्त अवधिमा पर्याप्त आवेदन नपरेमा चैत २० गतेसम्म म्याद थप हुन सक्नेछ । सर्वसाधारणले आईपीओमा न्यूनतम १० कित्तादेखि अधिकतम २ लाख कित्तासम्म आवेदन दिन सक्नेछन् ।
आईपीओ निष्कासनका लागि गराएको रेटिङमा कम्पनीलाई केयर रेटिङ नेपालले केयर एनपी डबल बी माइनस (आइएस) रेटिङ प्रदान गरेको छ । यसले वित्तीय दायित्व पूरा गर्न मध्यम जोखिममा रहेको जनाउँछ ।
कम्पनीको आईपीओमा नेपाल धितोपत्र बोर्डबाट स्वीकृति प्राप्त गरेका सम्पूर्ण सी आस्बा सदस्य बैंक तथा वित्तीय संस्थाका शाखाहरु र मेरो सेयरमार्फत आवेदन दिने सकिनेछ ।
कस्तो छ आयोजना र वित्तीय अवस्था ?
कम्पनीले दोलाखको सिंगटी खोलामा ‘रन अफ रिभर’ २५ मेगावाट क्षमताको सिंगटी खोला जलविद्युत् आयोजना निर्माण गरिरहेको छ । जसको कुल लागत ५ अर्ब ५० करोड ४६ लाख ६८ हजार रहेको छ । कम्पनीको प्रतिमेगावाट लागत निर्माण अवधिको ब्याजसमेत २२ करोड लाग्ने कम्पनीको विवरणपत्रमा उल्लेख छ ।
आयोजनाको साधारण लगानी फिर्ता हुने अवधि ८.१६ वर्ष र डिस्काउन्टमा लगानी फिर्ता हुने अवधि १६.४० वर्ष रहेको छ । ०७२ माघ २० गते विद्युत् उत्पादन अनुमति पाएको आयोजनाको विद्युत् उत्पादन बहाल रहने मिति वि.सं. २१०७ पुस २९ गतेसम्म रहेको छ । आयोजनाको निर्माण ९९ प्रतिशत सम्पन्न भइसकेको र नेपाल विद्युत् प्राधिकरणले विद्युत्गृह परीक्षण गरेमा शतप्रतिशत निर्माण सम्पन्न हुने आयोजनाले जनाएको छ ।
अघिल्लो तीन आर्थिक वर्ष र गत आर्थिक वर्षको सञ्चित नाफा–नोक्सान उल्लेख नगरेको कम्पनीले १०० रुपैयाँ प्रतिसेयर नेटवर्थ रहेको उल्लेख गरेको छ । चालु आर्थिक वर्ष २०७७/०७८ मा ११ करोड ६३ लाख ८० हजार सञ्चितन नाफा, ८ रुपैयाँ ०३ पैसा प्रतिसेयर आम्दानी र १०८ रुपैयाँ ०३ पैसा प्रतिसेयर नेटवर्थ हुने प्रक्षेपण गरेको छ ।
त्यस्तै, आगामी आर्थिक वर्ष २०७८/०७९ मा २४ करोड ९२ लाख सञ्चित मुनाफा, प्रतिसेयर आम्दानी ९ रुपैयाँ १६ पैसा र प्रतिसेयर नेटवर्थ ११७ रुपैयाँ १९ पैसा पुगे प्रक्षेपण गरेको छ । आर्थिक वर्ष २०७९/०८० मा ४१ करोड १८ लाख १८ हजार सञ्चित मुनाफा प्रतिसेयर आम्दानी ११ रुपैयाँ २२ पैसा र प्रतिसेयर नेटवर्थ १२८ रुपैयाँ ४० पैसा पुगे प्रक्षेपण गरेको छ । आर्थिक वर्ष २०८०/०८१ मा ६० करोड ७३ लाख ३६ हजार सञ्चित मुनाफा, प्रतिसेयर आम्दानी १३ रुपैयाँ ४८ पैसा र प्रतिसेयर नेटवर्थ १४१ रुपैयाँ ८९ पैसा पुग्ने प्रक्षेपण गरेको छ ।