काठमाडौं । नेपाल दूरसञ्चार कम्पनी (नेपाल टेलिकमको) को सर्वसाधारणतर्फको सञ्चालकको लागि अम्बिकाप्रसाद पौडलको मात्रै मनोनयन परेको छ । कम्पनीको सञ्चालक समिति सदस्यको लागि मनोनयन गर्ने समय आज दिउँसो २ बजेसम्म सर्वसाधारणतर्फको सञ्चालकको लागि पौडेलको मात्रै मनोनयन दर्ता भएको हो ।
टेलिकमको सर्वसाधारणतर्फको सञ्चालकको लागि आफूले उमेद्वारी दिएको पौडेलले पुष्टि गरे । टेलिकमको सञ्चालकको लागि पौडेलको मात्रै मनोनयन दर्ता भएसँगै उनी सञ्चालक समितिमा निर्विरोध चयन हुने भएका छन् ।
कम्पनीले यही चैत १३ गते १३औँ वार्षिक साधारणसभा गर्दै छ । उक्त साधारणसभाले आर्थिक वर्ष २०७६÷०७७ सम्मको सञ्चित मुनाफाबाट प्रस्तावित ४० प्रतिशत नगद लाभांश पनि पारित गर्दै छ ।
कम्पनीले साधारणसभा प्रयोजनको लागि गएको फागुन २८ गते सेयरधनी दर्ता किताब बन्द गरेको थियो । यस आधारमा फागुन २६ गतेसम्म कायम सेयरधनीले कम्पनीको सभामा भाग लिन सक्नेछन् ।
पौडेलले आफू सञ्चालक चयन भएमा कम्पनीलाई धितोपत्र बजारकै उत्कृष्ट कम्पनी बनाउने बताएका छन् । पौडेल निजी क्षेत्रको छाता संगठन नेपाल उद्योग वाणिज्य महासंघको कार्यकारिणी सदस्य तथा पुँजी बजार फोरमका सभापति हुन् ।
