काठमाडौं । प्रदेश नम्बर–२ का आठ जिल्लामा विद्युत् प्रसारण र वितरण प्रणाली सुधार गर्न ठेक्का सम्झौता भएको छ । नेपाल विद्युत् प्राधिकरण र टाटा प्रोजेक्टबीच बुधबार प्रदेश–२ ग्रामीण विद्युतीकरण आयोजना कार्यान्वयनका लागि करिब ४ अर्ब रुपैयाँको ठेक्का सम्झौतापत्रमा हस्ताक्षर भएको हो ।
प्राधिकरणले गरेको अन्तराष्ट्रिय टेन्डरमा सबैभन्दा कम बोलकबोल गरेर टाटा प्रोजेक्ट, भारतले ठेक्का पाएको हो । प्राधिकरणको आयोजना व्यवस्थापन निर्देशनालयमार्फत कार्यान्वयन हुने आयोजनालाई पाँच चरणमा विभाजन गरिएको छ ।
आयोजनामार्फत प्रदेश–२ मा पर्ने जिल्लाको विद्युत् आपूर्तिलाई भरपर्दो र गुणस्तरीय बनाउन आधुनिक उपकरणहरुसहितका ३३÷११ केभी, १६.६ एमभीए क्षमताका आठवटा सबस्टेसनको निर्माण गरिनेछ । यसैगरी, ३३÷११ केभी, आठ एमभीए क्षमताका दुईवटा सबस्टेसनको निर्माण गरिनेछ । उक्त सबस्टेसनको क्षमता १४८.८ एमभीए हुनेछ ।
यसका साथै प्रदेश–२ का जिल्लामा ३२३ सर्किट किलोमिटर ३३ केभी प्रसारणलाइन, ९५० सर्किट किलोमिटर ११ केभी लाइन र एक हजार सर्किट किलोमिटर ४०० भोल्टको नयाँ लाइन निर्माण गरिनेछ । आयोजना कार्यान्वयनका लागि नर्वे सरकारले ३ करोड ५० लाख अमेरिकी डलर अनुदान उपलब्ध गराएको छ । यो अनुदान एसियाली विकास बैंकमार्फत सञ्चालित हुनेछ ।
प्राधिकरणका तर्फबाट सम्झौतापत्रमा आयोजना प्रमुखहरु विमल चौधरी, रोशन खड्का, रन्धिर पाठक र अमित भगत, लेखाप्रमुख विष्णुप्रसाद आचार्य, इन्जिनियहरु वसन्त नेपाल र विसमविनोद खनालले र टाटा प्रोजेक्टका तर्फबाट महाप्रबन्धकहरु श्यामनारायण मित्तल र मनोजकुमार पटनायकले हस्ताक्षर गरेका छन् ।
आयोजनाको निर्माण ठेक्का सम्झौता कार्यान्वयनमा आएको ९०० दिन अर्थात् ३० महिनाभित्र सम्पन्न गर्ने लक्ष्य राखिएको छ । काम सम्पन्नपश्चात् प्रदेश–२ को समग्र विद्युत् प्रसारण र वितरण प्रणालीमा सुधार आई हाल सञ्चालित तथा आगामी दिनमा खुल्ने उद्योगहरु र घरायसी ग्राहकहरुले पर्याप्त र विश्वसनीय विद्युत् प्रयोग गर्न पाउने आयोजनाका संयोजक बोधराज ढकालले बताए । उनले उच्च प्राथमिकताको आयोजना भएकाले निर्धारित समयभन्दा पहिले नै काम सम्पन्न गर्न ठेकेदार कम्पनीलाई आग्रह गरे ।
निर्धारित समयभन्दा पहिले नै सक्ने लक्ष्यका साथ काम अगाडि बढाइने टाटा प्रोजेक्टका आयोजना प्रमुख सन्दीप कुमारले प्रतिबद्धता जनाए । आयोजनाबाट प्रदेश–२ का सप्तरी, सिरहा, धनुषा, महोत्तरी, सर्लाही, रौतहट, बारा र पर्सामा काम हुनेछ ।