काठमाडौ । पूर्वाधार र उत्पादनशील क्षेत्रमा पर्याप्त लगानी परिचालन गर्नुपर्ने राजस्वसचिव रामशरण पुडासैनीले बताएका छन् । नागरिक लगानी कोषको ३१औँ वार्षिकोत्सवको अवसरमा सचिव पुडासैनीले पुँजी बजारको स्थायित्व, गतिशीलता र विकासका लागि कोषको तर्फबाट थप काम गर्नुपर्ने समय आएको पनि बताए ।
उनले वित्तीय उत्तरदायित्व, पारदर्शीता, संस्थागत सुशासन र आकर्षक सामाजिक सुरक्षा योजना कार्यान्वयन नै कोषको प्रगतिको आधारस्तम्भ भएको धारणा राखे । त्यसैगरी, कोषले पुँजी बजारको विकास, गतिशीलता र बजारको स्थायितत्वको विषयमा काम गर्नुपर्ने उनले बताए ।
कार्यक्रममा कोष सञ्चालक समितिका अध्यक्ष प्रा. डा. रामचन्द्र भट्टराईले चालु आर्थिक वर्षको फागुन मसान्तसम्म कोषले सञ्चालनमा रहेका योजनाबाट १ खर्ब ६७ अर्ब ९९ करोड पुँजी संकलन गरी १ खर्ब ६३ अर्ब ३० करोड रुपैयाँ लगानी गरेको बताए । भट्टराईले उच्च आर्थिक विकासमार्फत समाजमा विद्यमान बेरोजगारीको अन्त्य गर्न नसेकसम्म दिगो विकास र स्थायित्व प्राप्त गर्न नसकिने बताए ।
त्यसका लागि कोषले आफूलाई अझ सुदृढ बनाउँदै ‘समृद्ध नेपाल र सुखी नेपाली’को राष्ट्रिय आकांक्षा पूरा गर्नेतर्फ काम गर्नुपर्ने आवश्यकता उनले औँल्याए ।
कार्यक्रममा कोषका कार्यकारी निर्देशक रमण नेपालले सेवाग्राहीको सेवालाई ध्यानमा राख्दै उपत्यकाबाहिर विराटनगर र पोखरामा शाखा कार्यालय सञ्चालन गरिरहेकोमा सुदूरपश्चिम प्रदेशको अत्तरिया र लुम्बिनी प्रदेशको बुटवलमा शाखा विस्तारको लागि भवन भाडामा लिई कार्यसञ्चालन गर्नेतर्फ कोषले काम सुरु गरिसकेको बताए ।
कार्यक्रममा नेपाल धितोपत्र बोर्डका अध्यक्ष भीष्मराज ढुंगानाले कोषले कुल लगानीको ६/७ प्रतिशत मात्रै पुँजी बजारमा लगानी गरेको भन्दै यो प्रतिशत १०/१२ प्रतिशत सम्म पुर्याउनुपर्नेमा जोड दिए । स्वदेशी मात्रै नभएर विदेशी स्रोत र साधनलाई परिचालन गर्नुपर्ने आवश्यकता उनले औँल्याए ।
