काठमाडौं । नेपाल राष्ट्र बैंकले डिजिटल भुक्तानी प्रणालीलाई प्रवर्द्धन गर्न विभिन्न क्षेत्रमा क्यूआर कोड जडान गरेसँगै कोडमार्फत भुक्तानी गर्नेको संख्यामा वृद्धि भएको छ । यसअघि, न्यून मात्रामा क्यूआर कोडमार्फत भुक्तानी हुने गरेकामा माघमा ५० करोड रुपैयाँ बढीको कारोबार भएको छ ।

नेपाल राष्ट्र बैंकले सार्वजनिक गरेको प्रतिवेदनअनुसार गत पुस महिनाको तुलनामा माघमा मात्र ४६ करोड ७० लाख रुपैयाँभन्दा बढीको कारोबार भएको छ । गत पुसमा एक अर्ब २४ करोेड ५० लाख रुपैयाँ बराबरको कारोबार भएकामा माघमा एक अर्ब ७१ करोड २० लाख रुपैयाँ बराबरको कारोबार भएको हो ।

गत पुसमा तीन लाख ७२ हजार १७६ पटक कारोबार भएकामा माघमा पाँच लाख ३५ हजार ७९० पटक कारोबार भएको छ । पछिल्लो समय कनेक्ट आईपीएस, मोबाइल बैंकिङ, इन्टरनेट बैंकिङ र वालेटमार्फत हुने कारोबार रकममा वृद्धि हुने गरेको छ । गत महिनाको तुलनामा माघमा मात्र अनलाइनमार्फत १० अर्ब रुपैयाँ बढीको कारोबार भएको छ ।

कनेक्ट आईपीएसमार्फत एक खर्ब चार चारको कारोबार
राष्ट्र बैंकले सार्वजनिक गरेको माघ मसान्तसम्मको तथ्यांकानुसार कनेक्ट आईपीएस, मोबाइल बैंकिङ, इन्टरनेट बैंकिङ, क्यूआर स्क्यान र मोबाइल वालेटमार्फत माघमा मात्र एक खर्ब ६३ अर्ब ८७ करोड रुपैयाँ बढीको कारोबार भएको छ । उक्त प्रविधिको प्रयोग गरी पुसमा एक खर्ब ५३ अर्ब १७ करोड रुपैयाँ बढीको कारोबार भएको थियो ।

बैंकको तथ्यांकानुसार माघमा मात्र कनेक्ट आईपीएसमार्फत एक खर्ब चार अर्ब ३९ करोडभन्दा बढीको कारोबार भएको छ । सो अवधिमा १५ लाख ४५ हजारपटक कनेक्ट आईपीएसको प्रयोग भएको छ ।

माघमा मोबाइल बंैकिङमार्फत ३८ अर्ब ५९ करोड ७० लाख रुपैयाँ बढीको कारोबार भएको छ । गत पुसमा ३३ अर्ब १५ करोड तीन लाख रुपैयाँ बढीको कारोबार भएको थियो । माघमा मोबाइल बैंकिङमार्फत ९६ लाख ७२ हजार ४७८ पटक कारोबार भएको छ ।

इन्टरनेट बैंकिङमार्फत नौ अर्ब २२ करोड ७० लाख रुपैयाँ बढीको कारोबार भएको छ । माघमा ३१ हजार ४८२ पटक कारोबार भएको छ । वालेटमार्फत पुसमा नौ अर्ब ६५ करोड ६० लाख रुपैयाँ बराबरको कारोबार भएकामा उक्त रकममा वृद्धि भई माघमा नौ अर्ब ९४ करोड ८० लाख रुपैयाँ बराबरको कारोबार भएको छ । एक महिनामा एक करोड ५१ लाख छ हजारपटक कारोबार भएको छ ।

यसैगरी, गत पुसमा अनलाइन (ई–कमर्स)बाट ८४ करोड ३० लाख रुपैयाँ बराबरको कारोबार भएकामा माघमा उक्त रकममा वृद्धि भई ९३ करोड २० लाख रुपैयाँ बराबरको कारोबार भएको छ । रासस