टोकियो । डिजिटल करेन्सी, ‘बिटकोइन’ को मूल्य यो साताको सुरुवातमा झन्डै ६२ हजार डलर पुगेर नयाँ रेकर्ड राखेको थियो । तर मंगलबार बिहानै विश्वको सबैभन्दा लोकप्रिय क्रिप्टोकरेन्सी ५३ हजार ७८५ डलरमा झरेको छ । 

यसअघि भारतमा डिजिटल सम्पतिमाथि प्रतिबन्ध लगाउन सकिनेबारे संचार एजेन्सी रोयटर्सले खबर गरेको थियो । यसका कारण नै बिटकोइनको मूल्यमा अचानक गिरावट देखा परेको हुन सक्ने शंका गरिएको छ । यस वर्ष बिटकोइन थुप्रै चर्चित हस्तीहरुसँग जोडिएको छ । टेस्लाका मालिक एलन मस्कदेखि ट्वीटरका प्रमुख ज्याक डोर्सी र प्रख्यात लगानीकर्ता गोल्मन साक्स समेतले यसमा अधिक चासो देखाएका हुन् । करेन्सी सम्बन्धी नीति निर्माता मसफुमी याममोतोका अनुसार बिटकोइनलाई अब लगानीकर्ताहरुले बेवास्ता गर्नै सक्दैनन् ।  

२०२० को अन्त्यपछि बिटकोइनको मूल्य तीन गुणाले बढेको छ । शनिबारको सो वृद्धि अमेरिकामा बाइडेनको नयाँ कोभिड राहत प्याकेज पारिद भएका कारण भएको बताइएको छ । २०२० मा बिटकोइनको कूल बजार भाउ १० खर्ब डलर बराबर रहेको थियो । 

तरपनि बिटकोइनको मूल्य अनियमित रहँदै आएको हुँदा यसमा लगानी गर्नु जोखिमपूर्ण नै मानिएको प्राविधिकविद्हरु बताउँछन् । हालै देखा परिरहेका वृद्धि चाहिँ ठुल्ठुला कम्पनीसँग यसको संलग्नताका कारण रहेको बताइएको छ । त्यस्तै कोभिड महामारीमा मानिसहरु नोट पैसा र कोइनसँग टाढिदै गएकाले पनि बिटकोइनको प्रयोग र कारोबार बढेको विश्वास गरिन्छ । तर बिटकोइनको कारोबारमा धेरै ठूलो ऊर्जा लागत हुने हुँदा यसले वातावरणमा पुर्याउने हानि सम्बन्धी चिन्ता व्यक्त गरिएको छ ।  रोयटर्सबाट