काठमाडौं । काठमाडौं महानगरपालिकाले महानगरभित्रका अनुचित व्यापारिक क्रियाकलापका विरुद्ध उजुरी गर्न उपभोक्तालाई आग्रह गरेको छ ।

सोमबार विश्व उपभोक्ता अधिकार दिवसको अवसरमा आयोजित कार्यक्रममा बोल्दै काठमाडौं महानगरपालिकाकी उपमेयर हरिप्रभा खड्गीले बजारमा खाद्यपद्धार्थको मिसावटलाई नियन्त्रण गर्न र स्वास्थ्यमा हानि पुर्‍याउने वस्तुको बिक्री–वितरणलाई नियन्त्रण गर्नका लागि अनुचित व्यापारिक क्रियाकलापका विरुद्ध उजुरी गर्न आग्रह गरेकी हुन् ।

उनले महानगरपालिकाले सक्रिय रूपमा बजार अनुगमन गरिरहेको पनि बताइन् । बजारलाई गुणस्तरीय र स्वच्छ बनाउनको लागि स्थायी ल्याब सञ्चालनको तयारीमा रहेको उनले जानकारी दिइन् ।

उपमेयर खड्गीले आफ्नो व्यवसायले कानुनी प्रक्रिया पूरा गरे/नगरेकोमा सचेत हुन ध्यानाकर्षण गराइन् । उपभोक्ताहरु पनि सचेत र जिम्मेवार हुनुपर्ने उनले उल्लेख गरिन् ।