काठमाडौं । वैदेशिक रोजगारीको लागि कोरिया जान भाषा परीक्षा उत्तीर्ण गरेर ‘रोस्टर’मा नाम चढेकाहरुको ६ महिना म्याद थप्ने तयारी भएको छ । वैदेशिक रोजगार विभागका महानिर्देशक कुमार दहालका अनुसार रोस्टरको म्याद ६ महिना बढाउने गरी विभागले छलफल थालेको हो ।
विभागका अनुसार कोरिया रोजगारीको लागि भाषा परीक्षा उत्तीर्ण गरेर बसेकाको संख्या झन्डै सात हजार रहेको छ । त्यसमा नियमिततर्फका साढे पाँच हजार छन् भने विगत तीन वर्षमा भाषा परीक्षा उत्तीर्ण गरेर रोस्टरमा नाम चढेको तर हालसम्म जान नपाएका करिब १५ सय जना छन् । ६ महिना समय थप गर्दा उनीहरुसमेत जान पाउने विभागले जनाएको छ ।
हाल भाषा परीक्षा उत्तीर्ण गरेको दुई वर्षसम्म मात्र कोरिया जानेको रोस्टरमा नाम रहन्छ । दुई वर्ष नाघेको अवस्थामा भने पुनः भाषा परीक्षा दिएर उत्तीर्ण हुनुपर्ने व्यवस्था रहेको छ ।
कोरियाले अहिले कुनै देशबाट पनि श्रमिक लगेको छैन । कोरोनाका कारण अरु मुलुकबाट श्रमिक नलगेको हो । कोरोनाका कारण कोरिया सरकारले अन्य देशबाट जाने श्रमिकहरुलाई प्रवेशमा रोक लगाएकाले नेपालीहरु जान नपाएको ईपीएस कोरिया शाखाका निर्देशक इन्द्र गौतम बताउँछन् । रोजगारीका लागि पठाउन नेपालले त्यहाँको श्रम मन्त्रालयसँग समन्वय गरिरहेको उनले बताए ।
अब छिट्टै श्रमिक लैजाने प्रक्रिया सुरु हुने जनाइएको छ । कोरियाले नेपालमा भाषा परीक्षा उत्तीर्ण गरेर बसेकाहरुलाई लैजान सुरु गरेलगत्तै पाँच हजारजनाभन्दा धेरै कोरिया जान सक्ने विभागले जनाएको छ ।