विराटनगर । विराटनगरमा अटोरिक्सा चढेवापतको भाडा अब क्यूआर कोडबाटै भुक्तानी गर्न सकिने भएको छ । विराटनगरस्थित नोबेल मेडिकल कलेज रूटमा चल्ने अटोरिक्सा चढ्दा क्यूआर कोड प्रयोग गरी भुक्तानीको व्यवस्था एनसीसी बैंकले मिलाएको हो ।
नेपाल राष्ट्र बैंकका गभर्नर महाप्रसाद अधिकारीले शुक्रबार एक कार्यक्रमबीच केएन अटो यातायात प्रालिमा आबद्ध अटोमा क्यूआर कोडमार्फत भुक्तानी हुने अभियान सुरूवात गरेका हुन् । चालकहरुलाई एनसीसी बैंकले क्यूआर कोड उपलब्ध गराएको हो । गभर्नर अधिकारीले डिजिटल भुक्तानीलाई प्रभावकारी बनाउने राष्ट्र बैंकको अभियान रहेको सुनाए ।
विराटनगर–११ स्थित नयाँ सब्जी, फलफूल तथा गुद्री बजारमा पनि क्यूआर सेवाको सुरू गरिएको छ । एनएमबी बैंकले बजारमा क्यूआर कोडबाट भुक्तानीको व्यवस्था मिलाएको हो । डिजिटल माध्यमको भुक्तानी पारदर्शी हुने गभर्नर अधिकारीको दाबी छ ।