काठमाडौं । चैत १ गतेबाट लागु हुने गरी नयाँ ब्याजदर सार्वजनिक गरेको हिमालयन बैंकले बचतको ब्याजदर यथावत् राख्दै मुद्दती निक्षेपको ब्याजदर बढाएको छ ।
बैंकले ३ महिना अवधिको व्यक्तिगत मुद्दती निक्षेपको ब्याजदर ४ प्रतिशत र संस्थागत मुद्दती निक्षेपको ब्याजदर ३ प्रतिशत यथावत् राख्दै तीन महिना अवधिको संस्थागत मुद्दती निक्षेप नवीकरणमा दिने ब्याजदर भने ३ प्रतिशतबाट साढे ३ प्रतिशत पुर्याएको छ ।
यस्तै, ६ महिना अवधिको व्यक्तिगत मुद्दती निक्षेपको ब्याजदर ५ प्रतिशतबाट ६ प्रतिशत, संस्थागत मुद्दती निक्षेपको ब्याजदर ४ प्रतिशतबाट ५ प्रतिशत र सोही अवधिको संस्थागत मुद्दती निक्षेप नवीकरण दिने ब्याजदर ४ प्रतिशतबाट साढे ५ प्रतिशत पुर्याएको छ ।
९ महिना अवधिको व्यक्तिगत मुद्दती निक्षेपको ब्याजदर यथावत् राखेको बैंकले संस्थागत मुद्दतीतर्फ भने नवीकरण र नयाँ दुवैमा ४ प्रतिशतबाट एकैपटक ६ प्रतिशत पुर्याएको छ । चैतबाट लागु हुने गरी नयाँ ब्याजदर सार्वजनिक गरेका एभरेस्ट र स्ट्यान्डर्ड चाटर्ड बैंकले भने ब्याजदर परिवर्तन गरेका छैनन् ।
यस्तै, हिजो नयाँ ब्याजदर सार्वजनिक गरेको कुमारी बैंकले अवधिअनुसार नयाँ संंस्थागत मुद्दती निक्षेपमा ४.७५ प्रतिशतदेखि ६.७५ प्रतिशत ब्याजदर दिँदै आएकोमा अब सबैमा ७ प्रतिशत र नवीकरण संस्थागत मुद्दतीमा ४.८५ प्रतिशतदेखि ६.८५ प्रतिशत ब्याज दिँदै आएकोमा चैत १ बाट ७ प्रतिशत ब्याजदर दिने भएको छ ।
व्यक्तिगत मुद्दती निक्षेपमा पनि ३ महिनादेखि १ वर्ष अवधिको मुद्दती निक्षेपको ब्याजदर ६ प्रतिशतबाट बढाएर ६.५० प्रतिशत दिने भएको छ । तर, हिजो नयाँ ब्याजदर सार्वजनिक गरेको नेपाल एसबिआई बैंकले भने ब्याजदर यथावत् राखेको छ ।