काठमाडौं । बड्वाइजर बियर नेपालमा पनि उपलब्ध हुन थालेको छ । अन्हाइजर बुस इन्बेभ (एबी इन्बेभ)ले दक्षिण एसियामा आफ्नो उपस्थिति सुदृढ बनाउन नेपालमा सो बियर बिक्री सुरूवात गर्ने घोषणा गरेको छ ।
संसारका १५० भन्दा बढी देशमा सफलता प्राप्त गरिसकेको अमेरिकी शैलीको लागर बियर बड्वाइजरको स्वाद अब नेपाली उपभोक्ताले समेत लिन पाउने भएका हुन् । बड्वाइजरको लन्चसँगै एबी इन्बेभले आफ्नो उत्पादन लाइन विस्तार गर्न उपभोक्ता प्राथमिकता विकास गर्ने र देशमा बियर खण्डलाई पुनः परिभाषित गर्ने लक्ष्य राखेको छ ।
एबी इन्बेभले जावालाखेल ग्रुप अफ इन्डस्ट्रिजअन्तर्गतको राज ब्रुअरीसँग विशेष साझेदारीमार्फत फोस्टर्स बियर प्रवेश गराउँदै आफ्नो आगमन जनाइसकेको छ ।
बड्वाइजरको नेपालमा सुरुवातको क्रममा एबी इन्बेभको भारत र दक्षिणपूर्व एसियाका अध्यक्ष कार्तिकेय शर्माले बढ्दो युवा जनसंख्या र बियर रुचाउने जमातका कारण नेपाल एउटा महत्वपूर्ण बजार रहेको बताए ।
बड्वाइजरको सुरुवात सन् १८७६ मा संयुक्त राज्य अमेरिकामा एक अमेरिकी स्टाइल लागर बियरको रूपमा भएको थियो । आज पनि बड्वाइजर १४० वर्षको ब्रुइङ प्रक्रियाको माध्यमबाट आफ्नो बेग्लै पहिचान र संसारभर आफ्नो अलग्गै छाप छोड्न सफल भएको छ । उत्तम सन्तुलन र स्वादको लागि बड्वाइजर आयातित सुगन्धित हप्स, माल्टेड जौ र चामलको समिश्रणबाट बनाइन्छ । बड्वाइजर प्राकृतिक कार्बोनेसन, बिचवुड एजिङ र लामो समयसम्म बु्रइङ गरी तयार गरिएको हुन्छ ।