काठमाडौं । कर्णाली नदीमा बेपत्ता एक महिलासहित उनका दुई सन्तान अझै फैला परेका छैनन् । उनीहरुको खोजी जारी छ ।

सोमबार दैलेखकी एक महिला चार सन्तानसहित कर्णाली नदीमा डुबेर बेपत्ता भएकी थिइन् । आठबिस नगरपालिका–३, निमाइलकी ३५ वर्षीया सुकी बडुवालले चार छोराछोरीसहित कर्णाली नदीमा हाम फालेको स्थानीयले बताएको प्रहरीले जनाएको छ ।

प्रहरीले घटनास्थल राकम पुगेर अनुसन्धान गरिरहेको छ । घटनास्थलमा जिल्लास्थित उच्च प्रहरी अधिकारी पनि पुगेका छन् ।

सुकी बडुवालका दुई छोरी १४ वर्षीया कल्पना र १२ वर्षीया सरिताको शव सोमबारै अछाममा भेटिएको थियो । ती शवको आज पोस्टमार्टम गरिने कर्णाली प्रदेश प्रहरी प्रमुख डीआईजी वसन्त पन्तले बाह्रखरीलाई जानकारी दिए । पोस्टमार्टमपछि थप कुरा खुल्न सक्ने उनको भनाइ छ । आफू पनि घटनास्थल जाँदै गरेको उनले बताए ।

फेला परेका दुई शवको शरीरको बाहिरी भागमा खासै चोटपटक नदेखिएको प्रहरीले जनाएको छ ।

आमा सुकीसँगै १० वर्षीय छोरा ललित र ५ वर्षीया छोरी रजनीको शव भेटिएको छैन । स्थानीयले सुकीले कर्णाली नदीमा हाम फालेको बताए पनि प्रहरीले भने घटनाको वास्तविकता अनुसन्धान भइरहेको जनाएको छ ।

सुकीका श्रीमाने मानसिंह बडुवाललाई प्रहरीले सोधपुछका लागि नियन्त्रणमा लिएको छ ।