जनकपुरधाम  । महोत्तरीको पिपरा गाउँपालिका ५, सहोर्वाका ६५ वर्षीय मोसाफिर झा र उनकी पत्नी ६० वर्षीया गीतादेवी बेपत्ता भएको दुई सत्ता बित्दा पनि प्रहरीले रहस्य पत्ता लगाउन सकेको छैन । कोठामा सुतिरहेका झा दम्पती फागुन ९ गते रातिबाट बेपत्ता भएका हुन् ।

झा दम्पती बेपत्ता भएसँग उनको परिवार चिन्तित बनेको छ । गाउँले स्तब्ध बनेका छन् । प्रहरीले झाको घरमा चौबीसै घण्टा सुरक्षा दिइरहेको छ । आउजाउ गर्नेमाथि निगरानी राखेको छ । आइतबार साँझ प्रदेश २ का आन्तरिक मामिला तथा कानुनमन्त्री ज्ञानेन्द्रकुमार यादव, डीआईजी धीरजप्रताप सिंहलगायतको टोली पीडित परिवारलाई भेटेका छन् ।
 
मन्त्री यादव र डीआईजी सिंहले चाँडै दोषी पत्ता लाग्ने पीडित पारिवालाई आश्वासन दिए । अनुसन्धानको नजिक पुगिसकेको भन्दै चाँडै दोषी सार्वजनिक गर्ने सिंहले बताए । 

"नियन्त्रणमा लिइएका कोही छिमेकी छन् भने कोही आफन्तसमेत छन्," उनले भने, "तीनवटा क्लु प्रमाणका रुपमा फेला परेको छ । तर, फेला परेको प्रमाणको विषयमा अझै केही प्रमाण आवश्यक परेको हुनाले केही समय लाग्न सक्छ ।" झा दम्पतीले प्रयोग गर्ने झुल पोखरीमा भेटिएको र घटनास्थलमा रगतको छिटा देखिएकाले हत्याको भएको अनुमान गरिएको छ । 

प्रहरीले झा दम्पतीका छिमेकीसमेत रहेका जग्गा व्यवसायी रामबाबु यादव, भारतीय हरेन्द्र ठाकुरसहित चारजना नियन्त्रणमा लिएको छ । घटनास्थलमा फेला परको रगतको नमुना परीक्षणका लागि काठमाडौं पठाएको र रिपोर्ट अहिले नआएको सिंहले जानकारी दिए । झा मालपोत कार्यालयका पूर्वकर्मचारी हुन् ।