काठमाडौं । २०६३ चैतमा भएको गौर हत्याकाण्डका पीडितहरुले न्याय नपाएको भन्दै आफूहरुलाई न्याय दिलाउन सरकारसमक्ष माग गरेका छन् ।

काठमाडौंमा आइतबार पत्रकार सम्मेलन गरी गौर हत्याकाण्डका पीडितहरुले आफूहरुले हालसम्म न्याय नपाएको भन्दै आफूहरुलाई न्याय दिलाउन सरकारसमक्ष माग गरेका हुन् । २०६३ चैत ७ गते रौतहटको गौरस्थित राइसमिल चौरमा तत्कालीन माओवादी पार्टी र उपेन्द्र यादव नेतृत्वको मधेसी जनअधिकार फोरमका कार्यकर्ताबीच झडप हुँदा २७ जनाको मृत्यु भएको थियो भने दजनौँको संख्यामा घाइते भएका थिए ।

अन्तर्राष्ट्रिय समुदाय, सरकारलगायतले घटनाको निरीक्षण गरी उक्त घटना राजनीतिक अभिप्रायले नभई जघन्य अपराध भएको रिपोर्टसमेत निस्केको जिकिर गर्दै पीडितहरुले सरकारले दोषीलाई कारबाही नगरेको आरोप लगाएका छन् । 

दोषीलाई कारबाही गरी मृत्यु हुनेहरुलाई सहिद घोषणा गर्न र न्याय दिलाउन पीडितले माग गरेका हुन् । विगतका कुनै पनि सरकारले दोषीमाथि कारबाही नगरेको भन्दै पीडितले दुःख व्यक्त गरेका छन् ।